LIMA ka mga linog ang ningtay-og sa Pilipinas kagahapon sa buntag, usa niini ningtala og magnitude 7.1 nga gikusgon.
Unang linog dunay gikusgon nga 6.9 sa kadagatan sa Cotabato city, matod sa Philippine Institute of Volcanology and Seismology (Phivolcs).
Gisundan dayon kini sa lain pang mga aftershock, nga nitay-og apil sa Cebu city, diin ang gikusgon niabot og intensity 2.
Matod sa Phivolcs nga ang unang linog na-record mga alas 6:08 kagahapon sa buntag nga dunay gikusgong 6.9, ug tectonic ang gigikanan.
Ang epicenter nasubay nga nahimutang mga 94 kilometros southwest sa Cotabato City, nga nasinati sa Intensity II sa Surigao City ug General Santos City.
Matod sa Phivolcs nga ang unang aftershock natala mga alas 6:51 sa buntag ug dunay magnitude nga 6.7.
Ang epicenter nahimutang mga 97 kilometros southwest sa Cotabato City, ug nasinati sa Intensity II sa Butuan City ug Surigao City.
Ang ikaduhang aftershock nahitabo mga alas 7:15 sa buntag ug ang epicenter nasubay mga 98 kilometros southwest sa Cotabato City.
Duna kiniy 7.1 nga magnitude.
Kini nasinati sa Intensity IV sa Tanjay City ug San Jose City, Negros Oriental; Intensity III sa General Santos City; Lingig, Surigao del Sur; San Jose ug Hamtic, Antique; Irosin sa Sorsogon ug Sorsogon City;
Sa gikusgon nga Intensity II sa Cotabato City; Kidapawan City; Dipolog City; Tacloban City; Davao City; Legazpi City; Cagayan de Oro City; Cebu City; Dumaguete City.
Ang linog niuyog og apil sa Manila ug Antipolo city sa gikusgong Intensity II.
Matod sa Phivolcs nga posibleng ang tinubdan sa tectonic quakes mao ang deformation sa subducted slab sa Molucca Sea Plate.
Ang United States Geological Survey nitala second aftershock og magnitude nga 7.4.
Matod sa USGS nga ang ikatulong aftershock na-recorded mga alas 9:44 sa buntag sa gikusgong 5.3.
Matod niini nga ang epicenter nahimutang mga 90 kilometros southwest sa Cotabato.
Natala sa USGS ang ikaupat nga fourth aftershock sa mga ala 1:35 sa hapon nga dunay gikusgong 6.2.
Matod niini nga ang epicenter nahimutang mga 135 kilometros south-southwest sa Cotabato.
Bisan sa kusog kaayong linog ug aftershocks, ang National Disaster Coordinating Council (NDCC) niingon nga wa pa sila makadawat og taho nga dunay danyos sa apektadong mga lugar kagahapon sa hapon.
“There is no damage. Although it’s 6.1 intensity, there are no reported damage in the Cotabato City areas,” matod ni NDCC executive officer ug concurrent Office of Civil Defense administrator Benito Ramos sa mga reporter.
Siya nidugang nga bisan gagmay nga mga kadaot way nakita diha sa mga building nga nahimutang duol sa epicenter, bisan kon ang NDCC personnel nag-monitor sa apektadong mga dapit.
“We have people there. It’s just a little shake and it did not cause damage. We did not even see cracks,” siya niingon.
Sa sayo pa, matod sa Phivolcs nga way kadaot nga nahimo ang linog nga tectonic ug wa say posibilidad sa pagkahitabo sa tsunami. (gmanews.tv/Internet)