GILAUMAN sa katawhan ning siyudad sa Cagayan de Oro ang kabag-ohan human karong adlawa matigayon ang unang State of the Nation Address (Sona) ni Presidente Benigno Simeon Aquino III sa kaulohan mga alas 4:00 sa hapon sa Batasan Pambansa Complex sa Batasan Hills siyudad Quezon.

Bisan paman ning maong adlaw, wala gideklarar sa Malacanang nga special holiday apan daghan gihapon sa trabaho ang mahunong kay paminawon man ang gibana-banang 20 ka minutos nga speech ni Aquino.

Kahinumduman nga ang Sona mao ang pagpahibalo sa katawhan sa kahimtang sa nasod apil na usab ang mga plano niini sa nasod.

Apan pipila sa katawhan ning siyudad naglaum nga unta dili problema ang ipaabot sa presidente sa katawhan kundili solusyon.

Kadaghanan sa katawhan nga nahinabi sa Sun.Star SuperBalita usa lamang ang gustong ipaabot sa Presidente ug kini mao ang paglaom nga unta unang solusyunan ang kalisod sa nasod tungod kay kini ang hinungdan nga dili gyod magmalinawon ang nasod.

Apil sa gilantaw ang pag-usbaw sa suholan labina ngadto sa mga construction worker, ug mga saleslady sa mga department store.

Pipila usab ka mga polis nibutyag nga naglaom nga usbawan sab ang ilang suholan.

Bisan paman sa paglaum sa pipila adunay supak usab niini.

Si Gerardo, (bansagon gipugngan) nga nahinabi sa Sun.Star SuperBalita, niingon nga ang paglingkod sa presidente wala gihapon kaayo ug kabag-ohan nga mahimo sa nasod kung ang katawhan mismo walay kabag-ohan nga gihimo sa kaugalingon. (SVB)