SI PRESIDENTE Noynoy Aquino magluwat karong adlawa sa iyang State of the Nation Address, sakto usa ka gatus ka adlaw niya sa puwesto.

Sayo niini, mikatap na sa media nga usa sa mga dagkong butang nga hisgutan ni Presidente Noy sa iyang Sona mao ang pundo alang sa katalagman kun calamity fund nga gilimas na sa miaging administrasyon.

Sumala ni Noy nga usa pa lamang ka bagyo ang milaparo sa nasud apan halus nihubas na ang pundo alang sa pagtabang sa katawhan atol sa katalagman tungod kay gigasto na, wa masayri unsay gigastuhan sa iyang gipulihang pangulo.

Kun magmaisugon nga motambong si kanhi Presidente karon kongresista sa Lubao, Pampanga Gloria Macapagal Arroyo sa SONA karong adlawa lagmit manampong siya sa iyang mga dawunggan sa ibulgar ni Noy nga iyang gibuhat.

Apan si Arroyo, sa wa masayring rason, milupad paingon sa Hong Kong niadtong miaging adlaw, busa di siya makadungog sa pagboyboy ni Presidenti Noy.

Kun tinuod nga nihubas na ang pundo sa calamity fund kay gigasto sa miaging pamunoan angay lang nga patubagon si Arroyo niini. Unsay mahitabo sa mosunod nga mga adlaw una mapupos ang tuig 2010? Unsay gastuhon sa kagamhanan sa pagtabang sa katawhan nga mahiagum sa katalagman? Kung pwede lang unta, pataplon siya.