HUMAN nagmando si Mayor Sara Duterte nga magbutang og dengue desk sa City Hall aron matabangan ang mga nagkinahanglan og financial assistance, nalipay karon ang mga ginikanan sa mga bata nga nagkasakit og dengue dinhi sa siyudad sa Davao.

Si Crisaldo Mabido, amahan sa usa ka bata nga nagkasakit og dengue, nagbutyag sa SuperBalita nga nalipay siya dihang nakabalita nga nagmando ang mayor nga tabangan ang mga pamilya nga dunay mga kabanay nga nasakit og dengue.

"Nalipay ko kay naa na man mi kaadtoan nga opisina sa gobyerno nga maoy makatabang sa among panginahanglan," ni Mabido kinsa nagpahiling sa iyang anak kagahapon sa hospital.

Si Mabido usa lamang sa gatusan ka mga ginikanan nga nagkasakit og dengue ang ilang mga anak ug nagkihanglan sab og hinanaling tabang sa gobyerno.

Niadtong miaging semana nagmando si Mayor Duterte nga magbutang og assistance desk sa City Hall aron maoy moatiman sa "automatic assistance" nga ikatunol ngadto sa mga nasakit ug namatay sa dengue.

Si City Information Officer Giovanni Aportadera nagbutyag nga ang pasiyente ug pamilya sa namatay sa maong sakit makadawat og P5,000 nga hinabang pinansiya.

"Exclusive lang ni siya para sa taga-Davao. Naa na ni siya karon sa office ni Mayor. Ipakita lang ang opisyal nga diagnosis or ang death certificate," ni Aportadera sa mga tigbalita.

Gawas sa dengue desk sa City Hall, ang buhatan sa Lingap Para Sa Mahirap (Lingap) didto sa Southern Philippines Medical Center (SPMC), nagatahag sab og tabang sa mga nakasakit og dengue. (AD)