USA ka pulis ang nagpakamatay human niya napatay ang iyang asawa sulod sa ilang lawak sa alas 5:45 sa buntag kagahapon didto sa Barangay Panacan, siyudad sa Davao.
Ang pulis mao si PO2 Godofredo Concepcion Jr., 47, sakop sa Police Regional Office (PRO) 11, samtang ang asawa mao si Marife Concepcion, 35, nagpuyo sa Blk. 26, Lot 27, Luzville Subdivision, Barangay Panacan.
Ang magtiayon pulos nagkadugo samtang nagbuy-od sa sawog sa ilang lawak dihang gisusi sa ilang tulo ka mga anak kinsa nakadungog sa mga buto sa armas.
Si Police Chief Inspector Joe Neil Rojo, hepe sa Sasa Police Station, nagsulti sa iyang spot report nga sa wa pa nahitabo ang insidente nag-away ang magtiayon sa wa masayri nga hinungdan.
Nasayran sa imbestigasyon nga ang pulis buot molikay sa ilang panaglalis mao nga nangandam siya sa iyang mga gamit aron mosayo pagtungha sa iyang trabaho apan gipugngan siya sa iyang asawa.
Giingon nga giimbargo sa asawa ang service firearm ug yawe sa motorsiklo sa iyang bana aron dili makalakaw niadtong higayona.
Human nakuha sa asawa ang armas ug yawe, milakaw siya mao nga gisundan siya sa iyang bana ug gidala pagbalik sa ilang balay.
Mga anak nagbutyag sa kapulisan nga ilang nakita nga misulod ang ilang mga ginikanan sa lawak ug didto gipadayon ang ilang away.
Pipila ka minuto ang milabay, suma sa mga anak, ilang nadungog ang sunod-sunod nga buto sa armas mao nga ilang giablihan ang lawak ug didto maoy ilang nakita nga nagkadugo na ang ilang mga ginikanan.
Si Marife nakaangkon og daghang mga samad sa lawas samtang si Godofredo nakaangkon og samad sa ulo dihang gihiling sa mga sakop sa Scene of the Crime Operatives (Soco) Region 11.
Si Godofredo gidala sa mga paramedics sa Central 911 didto sa Southern Philippines Medical Center (SPMC) apan gideklara siya nga dead on arrival sa mga doktor.
Nakuha sa kapulisan ang usa ka 9mm caliber pistol ug lima ka baseyo sa bala didto sa crime scene. (Alger Dura)