HUMAN napakyas pagsakmit sa 7th leg title sa Manila, ang M.Lhuillier Kwarta Padala-Cebu Niños manikaysikay na sab alang sa ilang gitinguhang ikatulo nilang leg title sa Tournament of the Philippines (TOP).

Ning maong tahas, ang Niños mobisita sa Cagayan de Oro City alang sa 8th leg sa torneyo nga sugdan karong adlawa sa Xavier Uiversity gym.

Updates on President Benigno Aquino III's presidency

Ang Niños, kampiyon sa 1st leg nga gipahigayon sa Manila ug 6th leg dinhi sa Cebu, makigharong sa Hobe Bihon-Taguig City sa premirong duwa.

Unya sa main game, ang host Misamis Oriental Meteors makigbatok sa Ascof Lagundi.

Taliwala sa duha ka mga duwa ipahigayon ang hamubong opening ceremony nga tambungan nila ni Misamis Oriental Gov. Oscar Moreno ug Samahang Basketbol ng Pilipinas (SBP) Executive Director Noli Eala.

Si Eala maoy nag-organisar sa TOP, nga usa ka hiniusang torneyo sa Liga Pilipinas ug Philippine Basketball League (PBL).

Human nila napatigbabawan ang Mandaue leg, ang Meteors gipukan sa Niños sa Cebu leg finals.

Karon nga sila na’y host, nagtinguha gyud ang Meteors nga makabawos sa Niños.

“With the support of the crowd, we hope we can get back at them (Niños),” matod ni Meteors coach Jun Noel.

“We need to win this leg to boost our playoffs bid.”

Apan lisod gyud kaayo kini nga tahas alang sa Meteors gumikan kay gawas sa Niños, lig-on sab gyud ang uban nilang kontrahunon.