WA ug tuo nga ataki ang nadawat ni Mayor Michael Rama labot sa nagkadaiyang isyu nga giatubang sa iyang administrasyon.

Wa pa gani manginit ang iyang sampot paglingkod sa  labing gamhanan nga posisyon sa Cebu City Hall, daghan na ang misuway og tay-og sa iyang nahimutangan.

Gisaway siya sa pipila ka tawo nga naglakip sa mga sakop sa media. Duna man gani mga komentarista nga matag ataki nila ni Mike, pakapinan gyud og katawa, kining recorded nga agik-ik sa tawo nga gitawag sa mga musical scorer sa drama nga laughter.

Ambot og unsay pasabot nila ana, basta halos tanang nagdala og commentary program  duna nay binag-o nga gimik nga ilang gisukip sa ilang komentaryo.

Updates on President Benigno Aquino III's presidency

WA  MATAROG

Wa matarog si Mike sa mga negatibong report nga gipahid ngadto kaniya. Mao nay sakto.

Kinahanglan gyud nga di siya magpadala. Kinahanglan nga di siya manuyo. Labaw sa tanan kinahanglan nga di siya magpaapekto og magpadayon sa iyang mga gimbuhaton sama sa way nahitabo.

Kining mga nangataki niya wa man ni magrepresentar sa kinabag-an sa katawhan nga mibotar kaniya sa milabay nga eleksyon.

Sa ato pa wa ni magpasabot nga nawad-an na og pagsalig kaniya ang mabuot nga lungsoranon.

Ang ataki kabahin lang sa gitawag nga press freedom kun gawas sa prensa sa panibya ug uban. Bisan kanang namaligya og tambal ug nagpalanog sa ilang trumpa sa Carbon mahimong moapil pagpangataki kong gusto nila.

Pero sa giingon ko na, wa ni magdala sa sentemento sa kinabag-an sa katawhan. Mao nga di gyud angay nga mahimong emosyonal ang atong mayor, kay kining mga atakiha gipaabot nang daan sa mga opisyal sama kang Mike.

ABANTE

Mahimong sakto, mahimo sab nga sayop kining maong mga ataki.

Apan angayan sab gihapon nga patalinghugan kong ugaling kaayohan sa siyudad ang hisgutan. Sa ato pa, atubangon ni Mayor Mike kining maong mga ataki sa positibo nga paagi.

Hinuon, nakasabot ko sa uban nga nagpakahilom lang. Di man sila gusto nga kunis kunison si Mike sa kahanginan, mas gusto nila nga hatagan ang mayor og igong panahon pagpakita sa iyang labok, inay hukman dayon siya ning sayong bahin sa iyang pamuno-n. Tinuod kana.

Asay maayo og hatagan ta di Mayor Mike og igong panahon pagmatuod nga siya ang labing tukma, angayan og kualipikadong modumala sa atong dakbayan. Taliwala sa mga pagsaway ato siyang ingnon nga Abante Mayor Mike!