MODISKURSO karong adlawa atubangan sa joint session of Congress si Presidente Noynoy “PNoy” Aquino sa gitawag nga state of the nation address (Sona).

Mahibawo na kita unsay kahimtang sa atong nasod.

Updates on President Benigno Aquino III's presidency

Seguradong maapil sa iyang diskurso ang iyang kampanya batok sa wangwang. Mao kana ang state of wangwang.

***

Di motambong sa Sona ni PNoy si kanhi presidente ug karon Kongresista sa Pampanga Gloria Macapagan-Arroyo.

Nabalaka tingali siya nga sa diskurso ni PNoy siyay han-ukan sa tanang problema nga giatubang sa nasod.

Laliman kang maminaw nga hapit na mahurot og gasto ang budget alang sa 2010 maong wa nay magamit si PNoy.

***

Ang giatngan sa kadaghanan mao ang pamahayag ni PNoy unsaon niya pagpuril ang pangurakot ug unsaon niya paghaw-as sa katawhan gikan sa kalisod ug kakabos.

Ang taga Cabadiangan ra ba niingon nga matapos ang pangurakot ug kakabos kon mamuwak na ang kawayan.

Akong gisusi kon tinuod bang mamuwak ang kawayan.

Sumala sa Wikipedia, mamuwak ang kawayan kausa sa 80 ngadto sa usa ka gatos ka tuig.

***

Nisugyot si Cebu Provincial Board Member Agnes Magpale nga idili ang gitawag nga lingam massage, ang pagmasahe sa kinatawo sa lalake nga giingong makaayo niadtong dunay balatian sa prostate..

Matod pa ni Magpale, makapaubos kini sa dignidad sa mga babaye.

Moabot na gyud ang panahon nga himuong self-service ang lingam massage.

**

Ipasaka ni Kongresista Pablo Garcia (Cebu, 2nd district) ang usa ka balaudnon nga kon mahimong balaod, kadtong mga kaminyuon nga gibuwag sa simbahan tahuron na sa kagamhanan.

Di na kinahanglan pang modangop sa korte.

Sa ato, ang gibuwag sa simbahan, tahuron sa kagamhanan.