DEAR Papa Joe,
Maayong adlaw kanimo. Tawga lang ko og Chenitta. Sa nag edad pa ko og 23 years old, nagkaila mi ni Jojo. Pariho ni siya og nawong ni Piolo Pascual. Naa pod siyay mole sa left side kilid pud sa iyang mata. Basta diha dapita.
Nagkaila mi sa Gaisano Mactan niadtong November 3, 2003. Siya ang unang niduol nako ug nakig-ilaila.
Paghuman namog ila-ila, nilakaw na ko sa unahan.
Nagsige siya og tan-aw dayon giduol na sad ko niya pag usab kay nanagayo siya og cell number. Unya ako pud siyang gihatagan.
Ni-text siya nako dayon nagkita mi ug nanuroy mi. Naa man siyay sakyanan busa sayon ra namo pagsuroy, mangaon, magpahangin. Ihatod ko niya sa akong gitrabahoan..
Mga usa ka buwan kapin gikan mi nagkaila, nihangyo siya nako nga gusto siya makighilawas nako. Una wala gyud ko nisugot.
Kuyawan ko. Wala ra pod siya namugos.
Pagdangtan og usa ka semana kapin, nihangyo na pod siya. Dugay kaayo ko nisugot.
Ako gyud gi-huna-huna pag ayo. Nisugot ko kay lagi gusto na pod ko makabaton og anak kay regular naman ko sa akong gitrabahoan.
Naa gyuy nahitabo namong duha. Kanang gabhiuna nangaon mi sa restaurant sa Cordova. Sa tunga-tunga sa dagat nahimutang ang restaurant. Na-impress ko ato.
Two to three weeks gikan naay nahitabo namong duha, gihilantan ko unya na-delay akong menstruation. Ako siyang giteksan nga dili ko motrabaho kadtong gabhiona kay night shift man ko kay lagi gihilantan ko. Nireplay siya nga makigkita siya nako sa Shell Select gasoline station sa Pusok.
Kadtong gabhiona pag hiabot niya dito naa na siyay dala nga capsule nga daghan kaayo ug tabletas nga puti usa ka buok.
Maorag Boscopan ka dak-on. Iya dayon nga gipainom nako ang kadto tabletas nga puti ug usa ka capsule. Dayon nag-ihap-ihap siya sa iyang tudlo ug nangotana nako “Gidugo na ka?.” Ingon ko niya nga delayed ra. Ingon siya nako nga ang capsule kuwang pa man dugangan og palit unya hutdon og inom.
Unsa mang pagka unsa-a pila ka adlaw gikan ko niinom sa iyang gipainom nako pwerte gyung sakita sa akong pus-on. Dili ko ka lihok sa kasakit unya paminaw nako sige lang ko og gihilantan.
Niadto ko sa comfort room para maligo. Naa bitaw dugo nigawas ni dagaday sa akong paa nga nagbarog ko. Unya sakit kaayo akong pus-on. Nikalit lang ni siya og kawagtang. Wala na nipakita, wala poy estorya asa siya moadto. Dili na pod ma contact iyang cell phone. (sumpayan)