Team gitukod aron subdivision monitoron
GIHULMA ang usa ka special team sa dakbayan sa Talisay nga mo-monitor sa padayong pagsupak sa mga subdivision developer sa mga balaod nga gilatid sa Environmental Management Bureau (EMB).
Ang team naporma human maobserbahi nga dunay mga subdivision development ilabi na sa mga bukirang barangay nga napakyas sa paghimo og mitigating measures nga niresulta sa pagbaha ug pag landslide.
Si City Planning and Development Coordinator Christine Homez nitumbok sa Sta. Lucia Realty Development Corporation (SLRDC) nga usa sa mga developer nga napakyas sa pagtuman sa mga lagda.
Ang SLRDC nisugod sa pag develop sa ilang subdivision sa ibabaw nga bahin sa Barangay Lagtang niadtong 2002 ug sila ang gipasanginlan nga nakaguba sa P4-million nga barangay road project nga maoy gihimong agianan sa mga lumolupyo aron makalahus sa mga silingang barangay.
Gimanduan ang SLRDC sa pag-ayo sa dalan ug sa pagpahimutang og drainage system apan hangtod sa pagsuwat ning balita, way gihimo ang developer nga pagtuman.
Gipasanginlan sab ang developer nga maoy hinungdan sa kanunay nga pagbaha sa Barangay Candulawan nga tapad sa Lagtang nga niresulta sa pagkahugno sa koral sa silingan nga subdivision.
Ang bag-ong team gilangkuban sa mga representante sa EMB, Housing and Land Use Regulatory Board (HLURB), Bureau of Mines, ug sa pipila ka mga departamento sa City Hall.
Si Homez nga usa sa mga sakop sa team nagkanayon nga estrikto nga monitoring ang ilang himuon aron matuman ang mga lagda nga gilatid sa EMB ug sa DENR.
Mosugod na sa ilang gimbuhaton ang monitoring team sa sunod buwan. (VLM)