KON tinud-on kining gisulti ni Konsehal Alexander Dacer nga hatagan og higayon ang publiko nga makapadayag sa ilang sugyot atol sa committee meeting sa konseho, nan, angay kini suportahan.

Awhagon nato ang katawhan nga molambigit niining programa kay usa kini ka paagi nga madungog ang yango-ngo ug mga reklamo ngadto sa konseho.

Ug hinaut ta nga walay surambaw sa maong programa, ug dili pillion ang tawo nga mopadayag sa iyang sugyot.

Kinahanglan aksiyonan pod unta dayon sa konseho ang sugyot, gamay man o dako, basta makita nila nga makaayo kini sa kinabag-an sa katawhan.

Basin baya ha nga molahutay lang kini sa pipila ka meeting. Paningkamoti ninyo nga mahimo gyud kini matag committee meeting.

Unta kining maong paagi, kon mahinayon man, manakod sa kabarangayan. Mopasiugda pod unta ang mga barangay ug susamang program.

Sama sa ubang mga public institution, atol sa regular meeting sa board, dunay panahon sa public comment. Nianang bahina, ang publiko hatagan og higayon makapabuhagay sa ilang sentimento.

Atong panghinaot nga, gawas diha sa committee meeting, mohatag pod og higayon ang konseho alang sa public comment atol sa ilang regular session.

Pero, ang labing epektibo man unta nga paagi pagpaminaw sa mulo sa katawhan mao kining pagpatuman sa mga proyekto nga daan na nilang nahibaw-an, atol pa gani sa ilang pangampaniya.

Para nako, nagbalik-balik ra gyud kining mga problema ug wala kini matago sa atong gobiyerno. Ang problema lang kay lisod kaayo hatagan og solusyon gumikan sa daghang konsiderasyon.

Panid-an lang nato kon unsa gyuy lintonganay aning pasiugdahan ni konsehal Dacer. Basta Sir, ayaw gyud ipahalos sa pikas dalunggan ang mga sugyot sa katawhan. Hinumdomi, kon wala pa ang katawhan, wala mo diha karon sa konseho.