DEAD on arrival sa balay tambalanan ang 72 anyos nga lola human gipusil ug naputla'g kamot human gitigbas niadtong Domingo mga alas 7:30 sa gabii sa Zone-8, Poblacion, lungsod sa Opol, Misamis Oriental.

Si SPO3 Keniche Agtub sa Opol Police Station niila sa biktima nga mao si Teresita Barangot Lusica, 72, sa susamang dapit.

Sa interbyu nga gihimo sa Sun.Star SuperBalita ngadto kang Agtub, gibutyag niini nga duha ka mga lalaki nga armado ug naka-bonnet ang nanuktok sa puloy-anan ni Lusica.

Dihang pag-abri sa biktima, kalit lang nga gipusil hinungdan sa pagkaigo sa iyang dughan samtang ang usa ka suspek nga nagdala og sundang niadtong tungora dungan nga mitigbas niini sa baba ug tuong bahin sa kamot hinungdan sa pagkaputol niini.

Human naligid sa salog ang biktima, dali sab dayon nga nanglakaw ang mga suspetsado.

Ang insidente nakita sa katabang niining si Catherine Dacan nga naglili niadtong tungora human nangayo og tabang ang biktima.

Bisan paman giingong dead on the spot ang biktima gidala gihapon kini sa Northern Mindanao Medical Center (NMMC) ning siyudad sa Cagayan de Oro apan gideklarar patay na sa paghidangat.

Matud ni Agtub nga blanko pa sila sa pag-ila sa mga suspek ning panahona labina nga naka bonnet. Wala sab silay nakuhang inpormasyon nga adunay gikaaway ang biktima labina nga nag-inusara na lamang kini uban sa katabang ug ang mga anak niini nanimuyo na sa lain-laing dapit.

Gani si Dacan niingon nga wala siyay namatikdan nga gikaaway ni Lusica samtang nagsilbi siya sa puloy-anan niini.

Ang mga anak sa biktima hustisya ang gipangayo sa kamatayon sa ilang inahan labina nga dili tiaw ang pagpatay niini.