WALAY nay kinabuhi nga nakaplagan gawas sa iyang gate ang usa ka babaye niadtong Martes mga alas 5:30 sa hapon sa Capiz St., Aluba Subdivision, Brgy. Macasandig ning siyudad sa Cagayan de Oro.
Giila ang biktima nga mao si Maybelle Roa, 41, minyo, residente sa susamang dapit.
Sa pakighinabi sa Sun.Star SuperBalita ngadto kang PO2 Ruel Rodriguez sa Police Station 9 (PS9) sa Macasandig, gibutyag niini nga mao na lamang ilang nadawat nga report nga nakita na nga nagbuy-od ug naligo sa iyang kaugalingon nga dugo ang biktima gawas mismo sa gate niini.
Nagtapad pa kini og basyo sa bala sa 9mm nga pistola. Ang mga silingan gani walay nabati nga buto apan adunay nakamatikod nga adunay nigawas nga motorsiklo sa dapit nga posibleng maoy gisakyan sa suspetsado.
Naigo sa iyang ulo ang biktima nga maoy hinungdan sa hinanaling kamatayon niini. Girespondehan sa kapolisan ang insidente uban sa mga sakop sa Scene of Crimes Operatives apan dili nila masuta kung unsay motibo sa pagpatay labina nga intact pa ang mga gamit sa biktima sama sa bag, ug mga alahas nga gisul-ob niini.
Gisuta pa sa kapolisan karon kung kinsa ang responsable sa krimen ug unsay mga nakabikil niini. Wala pa usab mahatag ang kapolisan sa update kung asa kini nagtrabaho gawas lamang nga anaa gawas sa nasod ang bana sa biktima.