USA ka laksot nga balita nakahatag karon og kauwawan sa kamara baha sa Pilipinas.

Kini mao ang gikatahong pagkasikop ni Kongresista Ronald Singson sa unang distrito sa Ilocos Sur kinsa giingong nasakpan nga naghupot og 26 gramos nga cocaine ug 2 ka tabletas sa valium didto sa Chik Lap Kok airport sa Hongkong.

Si Kongresista Singson gikataho nga bag-o lang nagkabuwag sa iyang uyab, ang artistang si Lovie Poe, anak ni anhing aktor Fernando Poe Jr.

Ang amahan ni Singson nga Chavit gikataho usab nga dili mogamit sa iyang implowensiya aron makagawas sa prisohan ang magbabalaud nga anak. Usa kini ka maayong lakang ni Ilocos Governor Chavit.

Ang nahitabo kang Ronald posibling mahitabo ni bisan kinsa. Way bisan usa kanato nga nasayud unsay atong kapalaran.

Apan isip magbabalaud di kini maayo. Isip kongresista, angay siya nga mahimong modelo sa katarung ug kaayohan sa katilingban, ilabi na sa mga batan-on.

Kinahanglan nga tun-an sa liderato sa kongreso ang nahitabo sa batan-ong Singson ug ipahamtang ang tukma nga lakang aron dili magguba sa kridibilidad sa bay balauranan.

Gawas niini, mas maayo usab tingali nga magpa-drug test ang mga miyembro sa 15th congress aron ipakita sa katawhan nga sila hinlo sa gidili nga bisyo.

Pagabistahon pa ang kaso ni Singson ug wa pa kita masayud unsay iyang rason bahin sa napalgang druga sa iyang posisyon.

Maayo nga mapamatud-an niya nga wa siya'y sala tungod kay maot tan-awon nga ang usa ka 'lawmaker, law breaker.'