USA ang patay ug laing usa ang kritikal human mibangga ang usa ka motorsiklo ngadto sa railings sa tulay didto sa National Highway, Barangay Baylo, lungsod sa Monkayo, Comval Province, pasado alas 6:45 sa gabii niadtong Sabado.

Ang biktimang namatay nailhan nga mao si Cecelio Cagas, 45, ug molupyo sa Barangay Concepcion, siyudad sa Valencia Bukidnon, samtang kritikal ang usa ka Rey Pana, hamtung ang panuigon, ug molupyo Purok 7, Barangay Baylo, sa susamang lungsod.

Sumala sa report gikan sa Comval Police Provincial Office nga sakay sa usa ka Kawasaki Bajaj nga motor ang mga biktima nga dunay plate number 5697-LI ug gidrayban ni Pana ug angkas si Cagas padulong sila sa poblacion nga bahin sa lungsod sa Monkayo.

Pag-abot nila sa National Highway Bridge sa nahisgutang dapit, mibangga sa railing sa tulay ang motor nga gisakyan sa mga biktima hinungdan sa ilang pagkabalintong.

Nahiagum og grabing mga samad ug bun-og sa kalawasan ang duha ka mga biktima resulta sa hinanaling kamatayon ni Cagas, samtang si Pana nadala pa sa Comval Provincial Hospital ug kritikal ang kahimtang karon.

Patay'ng lawas ni Cagas gipahiluna sa usa ka punerarya sa lungsod sa Montevista samtang ang naaksidenting motor gikostudiya na sa mga otoridad.

Kapulisan sa lungsod sa Monkayo mihimo na og dugang imbestigasyon sa hitabo. (Marvin Pineda)