USA ka lalaki napalgang patay nga naglutaw sa punong human gikatahong nahulog didto sa Purok 3, Barangay Busaon, siyudad sa Tagum, Dominggo sa buntag.

Nailhan ang biktima nga mao si Vergilio Sumatra, hamtung ang panuigon, ug molupyo sa maong lugar.

Sa report gikan sa Tagum City Police Station nasayran nga pasado alas 7:00 sa buntag, napalgan sa caretaker sa punong nga si Joelito Agapay ang biktima nga wa nay kinabuhi nga naglutaw sa punong.

Sa gihimong imbestigasyon sa kapulisan nasuta nga ang biktima nabun-og ang ulo ug gituohang naparok una nahulog sa punong.

Ang bun-og sa ulo sa biktima ug ang pagkalumos sa tubig maoy usa sa gituohang hinungdan sa kamatayon niya.

Sa paghiling sa lawas sa biktima way nakitang ilhanan nga gipatay siya mao nga mga otoridad hugot nga nagtuo nga disgrasya ang hinungdan sa iyang kamatayon.

Gisulti sab sa mga kabanay sa biktima nga duna siyay sakit nga hypertension.

Kapulisan sa siyudad sa Tagum mihimo gihapon og dugang imbestigasyon sa hitabo. (Marvin Pineda)