MISIAW na sab ang mga bandido sa pagpangawat og kahayupan didto sa lungsod sa Kiblawan, Davao del Sur.

Duha ka mga kabaw ang dungang gikawat sud sa usa lang ka adlaw.

Niadtong adlaw'ng Dominggo, unang nawad-an si Juliet Cosino, hamtong, lumolupyo sa Barangay Balasiao, sa iyang babayeng kabaw. Ang kabaw gitugway niya sa ilang umahan. Apan sa dihang ibalhin na unta niya, nadiskubre nga nawala na kini sa iyang gitugwayan.

Mga alas 12:30 sa udto nakamatngon si Cosino nga gikawat na ang iyang binuhing kabaw.

Milabay ang pipila ka minuto sa dihang usa ka lalaking kabaw na sab ang nawala samtang gitugway sa mismong tugkaran sa balay ni Rico Escorial.

Si Escorial, sakop sa Civilian Volunteers Organization (CVO), hamtong, igo na lang sa pagreklamo ngadto sa buhatan sa kapulisan.

Si PO3 Allan Dave Parantar, nag-imbestiga sa nahitabo, nagsulti nga mga bandido kinsa naanad na nga mangawat og kahayupan maoy suspek sa krimen.

Gumikan niini, ilang gi-alerto ang katawhan nga magbantay aron nga di mabiktima sa mga cattle rustler sa ilang lugar. Naningkamot sab ang mga otoridad nga mabawi ang mga nawalang hayop pinaagi sa pagsubay sa gilublobang kuta sa mga bandido. (Dondon Dinoy)