PRISOHAN ang gitugpahan sa duha ka pulis nga nanghasi sa duha ka managlahing imnanan niadtong Dominggo dinhi sa siyudad sa Davao.

Ang duha giingon nga hubog nga misulod sa ilang giimnan nga patigayon ug nagwara-wara sa ilang mga armas hinungdan nga nangayo og police assistance ang tagdumala.

Unang gibalhog sa detention cell sa ala 1:00 kaadlawon si PO1 Arnel Bonggo nadistino sa Compostela Valley Provincial Police Office (CVPPO).

Si Bonggo gireklamo ni Ber Manuel, 28, resident disc jockey sa Zigudo Resto Bar nga nahimutang sa dalang F. Torres, ning siyudad.

Base sa imbestigasyon sa kapulisan, si Bonggo misulod sa maong resto bar dayon miinom og beer ug dihang nahubog na siya, nanghimas sa pribadong parte sa lawas sa usa ka waitress.

Wala pa makontento ang pulis sa iyang gihimong pagbinastos, giwara-wara niya ang iyang armas hinungdan nga nahadlok ang mga customer sa bar.

Tungod sa gihimo sa pulis, miresponde dayon sila PO3 Danilo Gutierrez, PO3 Intong ug PO2 Bentulan sa Mobile Patrol Group (MPG) sa Davao City Police Office (DCPO) human nakadawat og hangyo alang sa "police assistance."

Si Bonggo gipakalma sa mga pulis apan misukol siya hinungdan nga giposasan ug gidala didto sa DCPO.

Naimbargo sa kapulisan gikan sa suspetsado ang usa ka .40 kalibre nga pistola nga maoy giwara-wara sa maong pulis atubangan sa mga kustomer.

Samtang didto na siya sa detention cell, suma sa mga pulis, gisuwayan niya og sunog ang mga karaang dokumento nga gibutang duol sa pultahan sa prisohan pinaagi sa pagsindi sa iyang dalang lighter.

Samtang sa laing bahin, gisikop sab sa mga sakop sa Talomo Police Station ang usa ka nagpailang pulis kinsa nanghasi sa tungang gabii niadtong Dominggo didto sa Bonguyan Beach Resort, Times Beach, Barangay Matina Aplaya.

Sanglit hubog ang maong pulis ug dili motubag sa mga pangutana kaniya, nasayran lamang ang iyang bansagon nga usa ka Mallorca.

Sa pagsuwat ning balita, gisusi pa sa kapulisan ang iyang pagkatawo ug diin siya nadestino.