SIGON sa gipaabot, nakabaton ug pagsaway ug pagdayeg ang State of the Nation Address (Sona) ni President Noynoy Aquino kagahapon nga gipahigayon didto sa Session Hall sa House of Representatives sa kaulohan.
Dunay wa kauyon tungod kay gisugdan kini og pag-ataki sa kanhi administrasyon diin iyang gituki (og balik) ang mga nangawagtang nga mga pundo sa nasod.
Iyang giyagyag ang mga anomalusong transaksiyon sa milabayng pamunoan nga maoy hinungdan sa pagka-ut-ot sa nasod.
Ang mga palusot sa mga kurakot nga mga opisyal wa usab makaipsot sa Sona sa Presidente. Tataw nga ang mga kaalyado sa kanhi administrasyon nga nangaigo sa mga pag-ataki sa Presidente maoy nag-una ug mialkontra sa maong Sona.
Apan ang mga dumadapig ni Aquino mihangop sa iyang mga giluwatan. Wa man tuod nila gikalipay ang nahitabo, apan igo na kaayo nila nga ilang nahibaw-an ang grabing binuang sa miaging pamunoan.
Sa tungatungang bahin sa Sona, samtang gibutyag ang mga anomaliya, giyagyag usab sa Presidente ang iyang mga programa.
Sama sa iyang kampanya, iyang gitumong ang iyang pasalig ngadto sa mga kabus nga maoy nakapahugyaw sa masa.
Sa unang 100 ka mga adlaw sa Palasyo, gibutyag ni Aquino ang maayong dagan sa iyang pamunoan. Siya nanawagan sa iyang mga kaalyado nga makig-ayuda kaniya aron makab-ot ang tinud-anay ug limpiyo nga administrasyon.
Kon ato gyud nga tukion, daw sa naghulagway ug nagtinguha kini sa nasod nga mahaw-as gikan sa kalisod.
Apan sa kinatibuk-an, sama sa nangaging pamunoan, ang pasalig magpabilin nga pasalig gihapon kon kini dili gyud kahatagan ug katumanan. Kini maoy hagit sa bag-ong administrasyon.