KAPIN sa 30 ka mga balay ang nangaugdaw sa sunog sayo kagahapon sa kadlawon sa Barangay Camputhaw, dakbayan sa Sugbo.
Ang alarma sa sunog nga nidanyos og labing minos P2 milyunes nadawat alas 3:05 sa kadlawon diha sa Sitio Care, Purok 8, Barangay Camputhaw.
Mokabat sa 200 kapin ka mga pamilya ang nangaapektuhan sa sunog.
Ang sunog gialigar nga didto nagsugod sa balay ni Elsa Norca nga giokupahan sa iyang anak nga si Junel.
Niadtong higayuna wa si Junel tungod kay nagmaneho og habal-habal.
Si Barangay Konsehal Jeffrey tumulak niingon nga mi-spark ang linya sa kuryente sulod sa balay ni Norca.
Kalit lang nga nisubay ang kayo sa kesame, hangtod nga dali kining nakadako.
Dali sab kining nikaylap sa uban pang mga balay sa mga silingan nga kasikbit ra sa iyang gipuy-an tungod kay ginama sa light materials.
Daling nakamata ang mga silingan ug nakagawas sa ilang mga balay.
Daling naka-responde ang mga kawani sa barangay.
Matod pa ni Tumulak nga way gikataho nga missing o nasamad atol sa maong sunog, apan ang 5-anyos nga si Rey Uriel nakaangkon og mga pangos dihang siya ugang iyang inahan nangaligid sa sapa-sapa sa pagdinali-dali sa pagbiya sa dapit.
Matod ni SFO2 Roy Maratas nga ilang giisa ang 2nd alarm tungod kay nagsikitsikit ang mga balay.
Pag-responde sa kabomberohan, ilang nakontrolar ang maong sunog sulod sa 40 minutos. (JFT/dugang taho sa Sun.Star Cebu)