Dalagita giagtang pagpusil, namatay; magsuon suspek

MAAYONG pagka-igo sa agtang sa 15 anyos nga dalagita nga nitan-aw og kalingawan sa piryahan sa Brgy. Mactan, dakbayan sa Lapu-Lapu sa dihang nagpataka og kablit sa rebolber ang laing menor de edad nga lalake tumong sa nagtapok nga mga tawo.

Ang mga suspek mao ang managsuong Kiboy, 17 ug Sheena, 16, (tinuod nga mga ngan gipugngan) sa pagpatay sa usa ka babayeng tinun-an sa 2nd year high school.

Bugtong bala sa .38 kalibre nga rebolber maoy nakaingon sa hinanaling kamatayon ni Rica Mae Inot, tinun-an sa Bangkal National High School sa Brgy. Bangkal ning dakbayan.

Si Inot naglingaw-lingaw sa gipahigayon nga diskural ingon man piryahan samtang gisaulog ang kapistahan sa Barangay Soong, niadtong Dominggo sa gabii.

Nipasabot si PInsp. Juan Capacio, hepe sa Crime Against Person’s Desk sa Lapu-Lapu City Police Office (LLCPO), nga posible nga na-igo sa saag nga bala si Inot sanglit sigun sa mga nakasaksi nga niabot si Kiboy bitbit ang armas dayon nagsige og kablit tumong sa mga tawo.

Human sa pipila ka higayon nga nagpunay og kablit sa trigger, nibuto ang armas hinungdan nga natibuwaag ang mga tawo, samtang kalit nga nahagba si Mai-Mai diha na daplin sa karsada.

Dali nga nibiya si Kiboy luwan sa nagpaabot nga XRM nga motorsiklo diin kabahin sa plate number ang nakuha sa mga saksi nga 7839.

Matod sa mga saksi nga ang manghod nga si Sheena nagsilbi nga drayber sa motorsiklo dayon biya sa area.

Laing version nga nakuha sa kapulisan nga sa wa pa ang pagpamusil nianang pagka-alas 9:30 sa gabii sa susamang adlaw, ang gunman giingong gitabangan og kulata sa laing grupo sa mga batan-on.

Nibiya si Kiboy ug sa iyang pagbalik angkas na sa motorsiklo nga gimaneho sa iyang manghod nga babaye ug nagbitbit na og armas.

Atol niining pagsuwat, padayon nga gipangita sa kapulisan ang duha ka mga suspek kay sa dihang gisusi sa kapulisan ang gipuy-an, wa na kini diha.

Dugang pa ni Capacio nga ilang gitambagan ang mga ginikanan nga awhagon nga mo-surrender sa kapulisan ang ilang mga anak nga giakusahang namusil.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph