Sundalo naghangyo sa NPA undangon na pagpangdagit

SI STAFF Sergeant Bienvinido Arguilles nagpasalamat sa katawhan ug naghangyo sa mga rebeldeng New People's Army (NPA) nga undangon na ang pagpangdagit.

Si Arguilles, kinsa bag-o lang gibuhian sa mga rebeldeng NPA, nisimba didto sa St. Joseph the Workers Parish kuyog ang iyang pamilya ug gipaabot ang iyang kinasingkasing nga pasalamat ngadto sa simbahan ug katawhan.

Usa ang simbahan sa Davao del Sur nga niapil sa panawagan nga mabuhian si Arguilles. Gilusad sab sa katawhan ang signature campaign nga niresulta sa pagbuhi sa mga rebelde sa sundalo human ang 31 ka adlaw nga pagbihag kaniya.

"Nagpasalamat gyud mi sa Ginoo ug sa mga tawo nga nagsuporta sa panawagan nga I-ampo ang kagawasan sa akong bana," ni Luth, asawa ni Arguilles.

Si First Lieutenant Nathaniel Morales, Civil Military Operations Officer (CMO) sa 10th Infantry Division, nipaabot sab sa iyang pasalamat ngadto sa katawhan nga nitabang.

Samtang giawhag ni Arguilles ang mga NPA nga undangon na ang pagpangdagit human niya nakita nga di lalim ang gibating kaguol ug kabalaka sa iyang pamilya.

"Ang masulti lang nako sa ilaha dili na unta nila usbon ang ilang gibuhat sa akoa kay daghan gyud kaayong pamilya ang maguol," pung niya.

Samtang magpadayon ang imbestigasyon sa ilang han-ay, magpabilin si Arguilles didto sa Camp Panacan, siyudad sa Davao.

Nanawagan sab ang militar sa ilang kauban nga di mokompiyansa ug kanunay'ng maglikay nga di madagit sa mga komunista. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph