USA ka lalaki nadala sa ospital human gidunggab sa iyang silingan didto sa Barangay New Pandan, siyudad sa Panabo, Lunes sa hapon.

Nailhan ang biktima nga mao si Samuel Subibcay, hamtung ang panuigon, ug molupyo sa Purok Alaska, Manalac, Barangay New Pandan, siyudad sa Panabo.

Samtang ang suspek nailhan nga mao si Ryan Itang, hamtung ang panuigon, ug molupyo sa susamang dapit.

Sa report gikan sa Panabo City Police Station, nasayran nga nahitabo ang pagpanunggab pasado alas 3:00 sa hapon samtang nagbaktas lamang ang biktima, kalit nga miduol kaniya ang suspek nga gikan nga nag-inom ug gidunggab siya gamit ang kutsilyo.

Nahiagum og samad dinunggaban sa kalawasan ang biktimang si Subibcay ug daling gidala sa ospital.

Samtang ang suspek misibat sab dayon padulong sa wa matino nga lugar human sa hitabo.

Samtang sa laing bahin, usa ka lalaki napalgang patay didto sa Purok 4, Barangay Maduao, siyudad sa Panabo.

Nailhan ang biktima nga mao si Generoso Dayun, hamtung ang panuigon, ug molupyo sa Purok 3, susamang Barangay.

Sa report gikan sa Panabo City Police Station, nasayran nga pasado alas 8:00 sa buntag niadtong Lunes, napalgang patay ang biktima sa maong lugar.

Ang biktima matud pa dunay mga bun-og ug samad sa kalawasan nga maoy gituohang hinungdan sa iyang kamatayon.

Gisusi karon sa mga otoridad ang kaso aron masuta kinsay suspek sa kamatayon sa biktima. (Marvin Pineda)