USA ka inahan gipasakaan na og pormal nga kaso niadtong Lunes tungod sa akusasyon nga iyang gibaligya ang iyang anak sa kantidad nga usa ka libo ka pesos niadtong Sabado didto sa probinsiya sa Cotabato.

Giila sa kapulisan ang suspek nga mao si Makalia Ibrahim, 25, minyo ug molupyo sa siyudad sa Cotabato.

Sumala sa balita nga nasaksihan sa mga market guard sa merkado publiko sa Barangay Poblacion, Kabacan, nga gibaligya sa babaye ang iyang lima ka bulan nga anak sa usa ka negusiyante sa kantidad nga usa ka libo ka pesos.

Hinuon, wa gisulti sa kapulisan ang ngan sa nakapalit nga magpapatigayon.

Ang hitabo dali nga gitaho ngadto sa kapulisan hinungdan nga gidakop dayon si Ibrahim sa grupo ni Senior Inspector Joseph Samillano.

Atol sa imbistigasyon, gitug-an ni Ibrahim nga napugos siya sa pagbaligya sa iyang anak gumikan kay wa siyay salapi nga ipalit og pagkaon alang sa iyang laing duha ka mga anak.

Gidugang niya nga way trabaho ang iyang bana ug bag-o lang sila nagbuwag gumikan sa personal nga problema.

Gisugo karon ni Kabacan Mayor George Tan ang buhatan sa Municipal Health Office nga atimanon ang bata ug tabangan si Ibrahim.

Nipasalig si Tan sa suspek nga kon magbag-o siya, ilang ibalik ang bata apil na ang pagsibog sa kaso.

Posible sab nga mag-atubang og kaso ang negusiyante nga maoy mipalit sa bata.

Hinuon, ang kapulisan padayong nag-imbestiga sa maong hitabo aron gyud ilang masuta kun nagsulti ba sa tinuod ang suspek nga inahan. (Edgardo Fuerzas)