KASONG illegal possession of firearms ug arson ang gipasaka sa kapulisan batok sa usa ka pulis nga nanghasi sulod sa Zigudu Resto Bar sa ala 1:00 sa kaadlawon niadtong Dominggo dinhi sa siyudad sa Davao.

Gawas sa kasong kriminal nga gipasaka sa korte, atubangon sab ang kasong administratibo ni PO1 Arnel Bonggo nadistino sa Compostela Valley Provincial Police Office (CVPPO).

Ang kaso nakadoket sa IS # XI-02-INQ-10-G-00724 sa City Prosecutor's Office, Hall of Justice, Ecoland, ning siyudad.

Si Bonggo gidemanda sa Investigation and Detection Management Branch (IDMB) tungod sa paghupot og armas nga way lisensiya ug pagsunog niya sa mga dokumento nga gibutang duol sa pultahan sa iyang detention cell.

Si Bonggo gibalhog sa prisohan sa IDMB human siya gireklamo ni Ber Manuel, 28, resident disc jockey sa Zigudo Resto Bar nga nahimutang sa dalang F. Torres, ning siyudad.

Base sa inisyal nga imbestigasyon sa kapulisan, si Bonggo misulod sa maong resto bar dayon miinom og beer ug dihang nahubog na siya, nanghimas sa pribadong parte sa lawas sa usa ka waitress.

Wala pa makontento ang pulis sa iyang gihimong pagbinastos, giwara-wara niya ang iyang armas hinungdan nga nahadlok ang mga customer sa bar mao nga gisikop sa mga sakop sa Mobile Patrol Group (MPG).

Si Bonggo gipakalma sa mga pulis apan misukol siya hinungdan nga giposasan ug gidala didto sa IDMB.

Nasuta nga way lisensiya ang usa ka .40 kalibre nga pistola nga giwara-wara sa maong pulis atubangan sa mga kustomer.

Gihuwat sa maong pulis ang sunod mando sa korte sa Regional Police Office 11 bahin sa iyang mga kaso. (AD)