USA ka adlaw human nibuhi’g prediksyon si American trainer Freddie Roach nga tumbahon ni pound-for-pound champion Manny Pacquiao si Mexican Antonio Margarito karong Nobiyembre 13, nitubag sab dayon ang kampo ni Margarito.

Ang trainer ni Margarito nga si Robert Garcia, usa sa mga sumosulbong nga boxing trainers sa kalibutan, mibahad nga tumbahon sa iyang batos si Pacquiao sa ulahing rounds.

Updates on President Benigno Aquino III's presidency

Gipasabot ni Garcia nga dugay na niyang giistudyohan ang estilo ni Pacquiao ug ang taktika sab ni Roach sa pag-train og boksidor.

Tungod niini, gitino ni Garcia nga naa kaniya ang yawe aron pag-alkontra sa panagpares nila ni Pacquiao ug Roach.

“I’ve been watching Manny’s fights. I’ve been watching Freddie Roach also. I think that I’ve got a good idea about how they’re going to try to fight against us. I think that we have a great chance,” matod ni Garcia sa interbyu sa www.boxingscene.com.

Matod ni Garcia nga sa premiro niyang paggiya kang Margarito, gituman sa Mexicano ang iyang mga gipanulti hinungdan nga yano ra niyang nalupig si Roberto Garcia pinaagi sa unanimous decision.

“Antonio’s last fight with Roberto Garcia, he’ll be much better than that. That was his first fight with me and he did what I asked him to do,” asoy ni Garcia.

Sa laing bahin, si boxing legend Sugar Ray Leonard nibuhi sab og pangagpas kabahin sa Pacquiao-Margarito bout.

Alang kang Leonard nga sayon ra gyud kaayo kining awaya alang kang Pacquiao.

Sama sa tibuok kalibutan, nangandoy sab gyud si Leonard nga magkaabot sila si Pacquiao ug Floyd Mayweather Jr.