DAW nadungog ko ang pagka gun-ob sa dughan sa mga anak ni kanhi Pamuno karon kongresista Gloria Arroyo. Human sila makadungog sa Sona (State of the Nation Address) ni P-Noy sa miaging Lunes sa Batasang Pambansa.
Unang Sona ni Noynoy, ug tinuod nga nag-una sa kamatinud-anon.
Nanlipaghong ang mga kurakot nga naminaw kay giwiwi ang nakalabayng pagpahimulos sa bahandi sa nasod.
Panahon na nga sila manubag sa ilang mga sala. Matod pa ni Pamuno Aquino mga “kasalanan sa nakaraan.” Iyang giyagyag ang mga panguwarta sa mga kukhan gikan sa mga pundo sa imprastraktura ngadto sa calamity funds.
Si kongresista Datu Arroyo sa interview sa media nagkanayon nga way sala ang iyang inahan. Naa ang mga sinaligan sa iyang inahan nga mga Cabinet member nga maoy manubag.
Husto si Datu Arroyo, apan ang “command responsibility” anaa sa kamot sa kanhi Pamuno.
Nagpasabot nga sa pagpanubag apil gihapon ang inahan ni kongresista Datu.
Angay sad nga imbestigahon ang taga NFA sa pasangil sa naghinubra pagpangumpra sa bugas gawas sa nasod. Ang resulta nangalata kuno kining mga bugas taliwa sa kagutom sa minilyon nga mga kabos.
Di sad ko makadawat nga nangalata ang mga bugas. Ang polisiya nga “first in, first out” sa NFA nakasulbad sa suliran sa stock deterioration. Spokesman ako sa NFA sa rehiyon subra sa duha ka mga dekada.
Apan upat na ka mga tuig gikan sa akong pag-retiro. Wa na ko masayod sa tinuod nga kahimtang sa NFA bisan dinhi sa Central Visayas. Sa pagtuo nga nangumisyon ang opisyal sa kagamhanan sa rice importation angay sad ning imbestigahon aron posasan ang mga kurakot.
Si kanhi Agriculture secretary Arthur Yap ug karon kongresista na sa Bohol nangugat sa kasuko sa media interview. Matod niya inter-agency ang mohukom ug mo-aprobar sa rice importation. Sa ato pa, gipaagi sa hustong proseso.
Agi lagi sa proseso, apan sa burokrasya sa usa ka inter-agency, ang uban uyon-uyon lamang labi nang dunay nindot kaayong hinungdan. Imbestigahon ning mga sakop sa inter-agency group sa rice importation.
Pabor ko sa tuyo nga tan-awon ang mga ahensiya aron mayagyag ang mga abuso sa top officials. Kay mora sad nila og gingharian ang ahensiya nga ilang gipangulohan.
Pananglitan diha sa MWSS (Manila Waterworks Sewerage System), ang kwarta sa kagamhanan gipahimuslan pag-ayo sa mga top officials. Daghan kaayo ang mga bonuses nga makalibat sa uban sa kagamhanan nga pipila ra ang nadawat.
Daghan ang mingtuo sa Sona ni P-Noy. Hinuon, dunay nanaway. Kadtong mga kasangkayan sa miaging administrasyon. Natural man ni labi nang nakasapi ni sila sa hiwi nga paagi.
Uban ko sa singgit nga “mahimo nang magdamgo pag-usab” uban ni Noynoy.
(gapasan.erns@yahoo.com)