USA sa mga giisip nga hulga sa nasudnong seguridad karon mao ang pagkuyanap na sa negusyo ug problema sa pag-abuso sa gidiling drugas.
Ang mga nangaging administrasyon ningkompirmar sa kalawom na sa operasyon sa sindikato sa drugas nga nakaimpluwensya na sa pulitika – gitawag nga narco-politics.
Gani, ang bag-ong napili nga kongresista sa Ilocos nga si Ronald Singson nadakpan sa airport sa Hong Kong tungod sa pagsuway og pagpayuhot og drugas.
Samtang daghan pang estorya nga mga druglord ningdaog sa eleksyon o nagsuporta sa kadaugan sa mga piniling opisyal.
Nasayod kita nga ang mga batan-on nga may linghod pang salabotan mao kanunay ang biktima sa drugas.
Matod sa atong nasudnong bayani, Dr. Jose Rizal, “Ang mga batan-on mao ang paglaom sa nasod.”
Kon madaot na ang panghunahuna sa mga batan-on tungod sa drugas, may paglaom kaha ang nasod nga mahaw-as sa kalisod?
Apan sa unang State of the Nation Address (Sona) ni Pres. Benigno Simeon ‘Noynoy’ Aquino III, wa siya mohisgot ug way plano bahin sa pagpakgang sa pagkuyanap sa gidiling drugas.
Makaduda. Wa kaha siya naapektohi sa narco-politics?
Ang Sona ni Pres. Aquino gitaw-an sa uban nga susama sa unang Sona sa mga nangaging presidente nga nagtutok sa pag-ugkat ug pagbutyag sa mga baho sa ilang gisundan nga administrasyon.
Tinuod, ang korapsyon usa sa mga nagduot sa nasod sa kalisdanan apan, angay palapdan niya ang iyang panglantaw aron di mabiyaan ang ubang hulga sa nasudnong seguridad sama sa gidiling drugas.