PULIS nga sakop sa Mandaue City Police Office kinsang identification (ID) card nakuha sa bag nga iya sa nasikop nga gikatahapang drug pusher ug gitumbok nga mastermind sa pagpatay sa usa ka negusyante sa Carcar gipasakaag kaso sa iyang labaw sa MCPO.

Una niini, si Jay Camotes gidakop sa mga sakop sa Theft and Robbery Section (TRS) sa Cebu City Police Office (CCPO) tungod sa giingong kalambigitan sa pagpayuhot og drugas ingon man pagpatay sa usa ka negusyante sa siyudad sa Carcar.

Updates on President Benigno Aquino III's presidency

Atol sa pagsikop, nakuha gikan sa iyang bag ang shabu, armas ug uban pa lakip sa ID sa pulis nga iya ni SPO2 Ricardo Albotra, sakop sa MCPO ug nadistino sa intelligence section.

Si Albotra sakop sa CCPO kaniadto ug gikatahong nataktak sa serbisyo tungod sa pag Absent Without Official Leave (AWOL) apan nakabalik sa serbisyo ug nadistino na sa MCPO.

Ang pangulo sa MCPO nga si Senior Supt. Noel Gillamac nibutyag nga ilang pasagdan ang CCPO nga moimbestigar sa ilang sakop sanglit di sila gusto nga moapil aron di madudahan nga bias o adunay whitewash.

Apan gibutyag ni Gillamac nga siya mismo adunay gipasakang kasong administratiba batok kang Albotra tungod sa kanunay nga pagpalta sa trabaho nga way pagpananghid. (DRT)