TRISIKAD driver nga nagumon sa ilegal nga drugas naghikog kagahapon sa buntag human iyang napatay ang 24 anyos nga ulitawo nga iyang silingan.
Ang biktima iyang giatangan gikan nga naligo sa tubod sa Sitio Camban-as, Brgy. Lower Caliongan, lungsud sa Dalaguete, Sugbo.
Ang suspek nga nagpakamatay ginamit ang iyang pinuti giila sa kapulisan nga si Paulino Heredia, 40, taga Brgy. Poblacion. Si Heredia dunay kapuyo ug tulo ka mga anak.
Ang iyang napatay pinaagi sa pagdunggab sa makadaghan giila nga si Cefriano Caren, 24, kanhi crew sa usa sa mga restaurant sa dakbayan sa Sugbo, apan lumad nga taga Brgy. Caliongan.
Si Insp. Bonifacio Lucerna, hepe sa Dalaguete Police Station nga nahinabi sa Sun.Star Superbalita, nagkanayon nga mga alas 8 sa buntag kagahapon, si Caren sayong nibiya sa ilang balay aron maligo sa tubod sa ilang dapit pipila ka metros gikan sa ilang gipuy-an.
Dihang nipauli na siya mga alas 9:30 sa buntag human sa pagkaligo subay sa dalan, kalit lang nibutho si Heredia ug gidungab siya dala ang 18 inches nga pinuti hinungdan sa pagsamad sa iyang tiyan nga nilapos sa luyong bahin.
Gawas nga nilugwa ang iyang tinai, nasamad sab siya sa dughan, ulo hinungdan nga siya namatay diha-diha.
Human gipatay ni Heredia si Caren, nagdungab usab siya sa kaugalingon ginamit gihapon ang pinuti pipila ka dupa gikan sa natumbahan sa biktima.
Ang suspek naabtan pa sa mga tawo nga buhi apan namatay ra kini.
“Nigawas ang tinai sa biktima kay nilapos man gyud ang pinuti diha sa iyahang tiyan paingon sa luyo. Ug fatal sab ang igo sa iyahang dughan hinungdan nga wala na madala pa sa tambalanan samtang ang suspetsado nga nagpakamatay nag-ubo usab sa duol niini,” sumala pa ni Lucerna.
Tungod usab sa ka kusog sa uwan kagahapon sa buntag dihang nahitabo ang krimen, wa gilayon makaduol ang mga residenti didto sa dapit.
Ang uban nangahadlok usab dihang ilang nadungog ang siyagit sa biktima nga nangayog “tabang kay gidungab ko.”
Sa imbestigasyon nga nakuha sa kapulisan nasuta nga ang suspek buhi pa sa pag-respondi sa mga lumolupyo sa lugar diin naglimbag-limbag pa sa yuta.
Apan sa ilang kahadlok kay dunay deperensya sa pangutok, way nakaako sa pagdala sa hospital ug namatay gyud hinuon.
Matod ni Lucerna nga way record ang biktima sa ilang lugar, apan ang suspek gikatahong buwag sa kapuyo gumikan sa pagka-gumon niini sa illegal nga drugas ug ilado na kaayo sa lungsod sa iyang bisyo.
Hinuon gisalikway sa kapulisan ang nitumaw nga reports nga love triangle ang motibo sa krimen.
Wa hinuon nila giserhan ang imbestigasyon sa kaso sanglit ila usab nga gitan-aw ang posiblidad nga dunay laing tawo nga nihimo sa krimin sanglit mingaw ang lugar ug nibunok pa ang uwan sa bukid.