SIYAM ka mga kostumer ang nakuhaan og mga mahalon nga cellphone human gitulis ang usa ka internet cafe niadtong Domingo mga alas 9 sa gabii sa Pabayo-Dolores St., ning siyudad sa Cagayan de Oro.
Nakuha ang cellphone ni Pretty Balantag, taga Capt. V Roa St.; Jhon Gilbert Padilla, taga Bugo; Domisel Rodriguez, taga Abellanosa St.; Gory Cezar Beina, taga Martinez St; Clark Sembrano, taga Magsaysay St.; Kent Frank, taga Nazareth; Nicole Uy, taga Tomasaco St.; Kervin Jhon Medina, taga Nazareth; ug Rolando Luminares, taga Camaman-an ning siyudad.
Si Police Officer 2 Feliciano Belhot sa Police Station 9 (PS9) sa Macasandig nibutyag sa Sun.Star Superbalita nga mokabat P3,200 ang nakuha gikan sa lima ka mga suspetsadong mitulis sa Cyvil internet cafe.
Kalit lang nga misulod ang lima ka mga tulisan nga nagsul-ob og jacket, nagkalo ug gitaptapan ang nawong ug armado og 9-mm pistol.
Gipangtionan sa mga tulisan ang mga kostumer ug nideklarar og tulis dayon gitagsa-tagsa pagkuha ang cellphone ug ang kita sa maong establisimento niadtong gabhiona.
Nasayran nga wala nakuha ang cellphone sa ubang mga kostumer tungod kay nakahigayon pa kini pagtago.
Human nakuha ang tinguha dali nga misibat ang mga suspetsado sakay sa naghulat nga motorsiklo.
Sa kasamtangan padayon pang giimbestigahan sa PS9 ang kaso labina kini ang ikaduhang kaso sa pagpanulis nga natala sa presinto ning bulan. (Stephanie V. Berganio)