PATAY ang usa ka amahan samtang kritikal ang anak niini human nabangga ang gisakyang motorela niadtong nilabayng adlaw mga alas 11:00 sa gabii sa Sta. Cecelia, Gusa ning siyudad sa Cagayan de Oro.

Pipila ka minuto sulod sa emergency room sa Capitol University Medical Center (CUMC) nakabsan sa iyang kinabuhi si Ellomer Macas, taga Gusa ning siyudad. Kritikal usab ang kahimtang sa anak niining si Edith Mae, 19.

Nasayran gikan kang Roy Dablo sa Roads And Traffic Administration (RTA) nga nahinabi sa Sun.Star SuperBalita nga sakay ang mga biktima sa usa ka motorela ug paingonsa terminal sa Gusa. Gimaneho ang motorela ni Rico Tan.

Nabanggaan sa pick-up nga nagdala og plaka ECB-263 gimaneho ni Kent Chua, taga Kauswagan ning siyudad ang motorela sa pagliko niini.

Ang likod nga bahin sa motorela maoy nabanggaan hinungdan sa pagkaipit sa amahan samtang ang anak gigakos pag-ayo niini aron protektahan apan nabunal gihapon ang ulo niini dihang nibalitok ang motorela.

Dali nga gipangdala ang biktima sa CUMC apan pipila ka minuto sulod sa emergency room nakabsan sa iyang kinabuhi si Ellomer.

Samtang gihaya ang patayng lawas sa amahan nagpabilin sa talandugon ang anak.

Sa pagsulat ning balita, nagtingkagol sa Maharlika Detention Cell (MDC) ang biktima kinsa nakatakdang pasakaan og kaso.