PATAY ang usa ka amahan human gipusil ang ulo kagahapon mga alas 11:00 sa buntag sa Pinikitan, Camaman-an ning siyudad sa Cagayan de Oro.
Giila ang biktima nga mao si Crisano Tumanda-Crispo, 38, taga Palawan, Camaman-an ning siyudad.
Nasayran nga gikan pa sa puloy-anan ang biktima ug paingon sa Cogon nga bahin sakay sa kaugalingon nga motorsiklo dihang kalit lang nga gipusil ang ulo niini hinungdan sa pagkatumba.
Ang angkas niining giilang si Arnold deretsong miambak posibleng tungod sa kahadlok ug daling misakay og taxi. Gidudahang kaila niini ang mihimo sa pagpamusil.
Naigo ang ulo ni Crispo sa kalibre .45 nga milahos sa atubangan nga bahin hinungdan sa hinanaling kamatayon.
Gibutyag sa mga nakasaksi nga duha ka mga suspetsado nga sakay og motorsiklo nga kolor itom, nagsul-ob og bandana ang nitira sa biktima gani gitabo lamang niini ang biktima ug wala na minaog sa gisakyan.
Nahipos sa taga Scene of Crimes Operatives ang usa ka basyo sa kalibre .45. uban sa pitaka sa biktima ug mga kwarta nga anaa sa sulod.
Sa inisyal nga imbestigasyon sa kapolisan, nasayran nga adunay pending nga kasong Violence against Women and their Children o Republic Act (RA) 9262 ug illegal drugs kon RA 9165 ang biktima. Giingong naila usab sa mga pagpangawat ug pagpanguot sa mga pasahero og dyip apan padayon pa kining gisuta.
Nasayran nga pamilyado si Crispo ug adunay lima ka anak. Ang asawa niining si Jovie, mabdos ning panahona kinsa dili pa makadawat sa nahitabo sa iyang bana.
Nakurat usab ang mga anak niini sa nakitang amahan nga nagbuy-od gani gusto pa nga dalhon kini sa tambalanan aron matabang.
Sa pagsulat ning balita, gidala na ang patay'ng lawas sa Bollosos funeral parlor samtang ang kaso padayon pa nga giimbestigahan sa kapolisan labina blanko pa ang motibo sa pagpamusil ingon man ngadto sa mga suspek. (Stephanie V. Berganio)