MAS grandiyuso ang opening ceremony sa 10th Cebu Schools Athletic Foundation Inc. (CESAFI) karong Sabado sa Cebu Coliseum kumpara sa nangaging katuigan.

Sa press conference kagahapon sa conference room sa Cebu Coliseum, ang bag-ong marketing head sa liga nga si Joevin Eusebio nagkanayon nga ilang gibasi ang opening karong tuiga sa Cesafi sa University Athletic Association of the Philippines (UAAP) ug National Collegiate Athletic Association (NCAA).

Updates on President Benigno Aquino III's presidency

“We will create a change compare to the past opening ceremonies. We will have a great production numbers na pang-TV just like in UAAP and NCAA,” matod ni Eusebio.

Bisan usa pa lang ka buwan siya sa posisyon, gipasabot ni Eusebio nga gibuhat niya ang tanan aron mas grandiyuso gyud ang opening ceremony karong tuiga.

Gipasabot ni Eusebio nga dili niya ibutyag ang tanan nilang preparasyon aron paghatag

og dugang kulbahinam sa mga tumatan-aw.

Si commissioner Felix Tiukinhuy nagkanayon nga ning tuiga, ang Cesafi adunay tema nga “Power and Dominance.”

Gipasabot ni Tiukinhuy nga gipili nila kining maong tema aron pagdasig sa tanang partisipanteng tunghaan nga magpakalig-on sa tanang kombati nga ilang sagubangon.

“We will try to motivate every school to put power in their team,” pasabot ni Tiukinhuy.

Gitataw sab ni Tiukinhuy nga ilaha nang giklaro pagpasabot ang tanang lagda sa liga aron malikayan ang mga kontrobersya sama sa nahitabo sa miaging tuig.

Sa bag-ong tema, ang 9-time champion University of the Visayas (UV) Green Lancers mao gyud ang natumbok.

Karon nga wala na kanila ang 7-footer nga si Greg Slaughter, kinsa naa na sa Smart RP Gilas, mas dakodako na og poruhan ang ubang teams nga makapusgay sa ilang dominasyon.

Apan gipaneguro ni Green Lancers assistant coach Al Solis nga bisa’g wala si Slaughter, makaya gihapon nilang depensaan ang ilang titulo.

“Imposible man sab seguro nga dili mi maka-survive. Maka-survive ra gihapon mi.

Maalkanse man gani mi sa no.5 kay wala na si Slaughter, pero advantage man mi sa other positions,” matod ni Solis.

Alang kang Solis, ang University of Cebu (UC) Webmasters maoy usa sa labing lig-ong teams karong tuiga gumikan sa presensya ni 6’10” Junmar Fajardo.

Ang assistant coach sa Webmasters nga si Khalib Gawangon nanghinaot nga makuha na gyud nila ang titulo karong tuiga hilabi na kay posible nang mao na kini ang katapusang tuig ni Fajardo.

“Hopefully nga this year will be our year. Daghan mi’g bag-ong players pero ang naka-advantage lang kay sayo kaayo ming nag-start sa among training,” matod ni Gawangon.