HUMAN gilatid ni Presidenti Benigno Simeon Noynoy Aquino III ang iyang plataporma sa pakigbatok sa korapsyon nga maoy tinubdan sa pag-antos sa kinabag-an karon sa atong katawhan. Kining maong saad ug pasalig sa paglutos ug pagsilot sa mga gamhanang kawatan anaa unya unang magsukad sa buhatan sa Ombudsman, nga maoy prosecuting arm sa gobyerno sa mga kasong may labot sa pangawkaw ug pangabuso sa katungdanan.

Sa gipakitang inutil nga panerbisyo ni Merceditas Gutierrez, siya wala nay angayan pang pamatud-an pa ug ang bugtong sulbad sa problema mao ang dinalian nga pagpalagpot kaniya. Bisa’g human sa Sona (State of the Nation Address) sa Presidenti, siya mimando og imbestigasyon sa mga gisaysay nga mga anomaliya ni Noynoy apan kini klaro ug dayag nga konsuelo de bobo.

Updates on President Benigno Aquino III's presidency

Ubos sa Article 11 sa 1987 Constitution ang Ombudsman usa ka opisyal nga dili mamahimong tangtangon sa katungdanan gawas lamang kun adunay boluntaryong resignasyon, death or physical incapacity o pinaagi sa impeachment. Dili man makapaabot ang katawhan nga madutlan sa uwaw kining bayhana, labaw ning di usab ni madutlan sa barang o pagpanungo, hinungdan nga ang nahibiling alternatibo mao nalang ang pinaagi sa impeachment.

Apan aron ang impeachment molambo, kinahanglanon unya ang “one-third’s vote” sa mga miyembro sa House of Representatives aron ang gipasakang impeachment complaint mamahimong Articles of Impeachment unya mahandos kini sa Senado nga mamahimo na usab unyang Impeachment Tribunal. Dinhi makita na unya ang katag sa mga Kongresistang balimbing nga naglumbaanay na sa pagpalandong pinaagi sa kuwalisyon sa Partidong Liberal kon mopirma ba alang sa impeachment sa Ombudsman nga tigpanalipod sa mga anomaliya.

Sa tuyo nga makuha ang mayoriya sa Kamara de Representante, maoy gitahasan ni Noynoy si Sonny Belmonte nga taas na kaayo ang tahud sa pagka traditional politician.

Tuod man bisan og 150 lang ka mehoras ang gikinahanglan, iyang nakuha ang pagtuboy sa 240 gyud ka mga Congressmen aron siya mamahimong Speaker of the House ug kahatagan og sayong agianan ang mga programa sa Administrasyong Aquino sa Kongreso.

Dungan usab niini ang pag-abli sa ganghaan alang sa mismong mga congressmen nga mga alipores sa milabayng administrasyon. Sila nga mi-atake kang Noynoy panahon sa kampanya nga kuno “abnoy” ang aduna nay mga chairmanships sa committee.

Samtang miingon si Abraham Lincoln: “You destroy your enemies by making them your friends,” ang pangutana kon duna bay mapaabot nga pagduyog sa marching order sa administrasyong Aquino gikan sa mga bantay salakay nga mga kongresista? Nga kun makakita og benta, ang mga gisaligang mga bantay mao ra usay mounay sa pagsalakay.

Ang dalan sa kausaban kahatagan lamang og katumanan sa tinud-anay nga pagsalikway sa sayup og dili sa pagakos bisan pa sa sidsid niini sa bisan unsa nga katarungan.