Fredrick F. Gelbolingo
121 Prenza, Argao, Cebu
PWERTENG lipaya ni Bay Estor dihang nasawod sa iyang dunggan ang balita nga gikan sa radyo baba sa iyang mga silingan nga nahiabot na kuno ang anak ni Bay Betong gikan sa gawas.
Wala pod niya matino kon babaye o lalake ba kini. Kon babaye, tingalig nakabanag foreigner, matod pa sa iyang hunahuna.
Sud sa napulo ka mga tuig nilang panag-amigo ni Bay Betong, wala gyud kini maghisgot nga duna siyay anak nga nagpuyo sa gawas og nagtrabaho ba hinuon, bisan kapila na kini mahubog sa ilang panagtagay. Mao ray kanunay hisgutan niini ang iyang anak nga buotan nga karon tua nagtingkagol sa bilanggoan tungod sa kaso nga pagpanglabni og bag ug selpon tungod sa ilang kakabos.
Mao gani kuno nga nakapatukod silag arang-arang nga balay ug duna silay pipila ka importante nga mga aplayanses.
“Kalmaha ra diay ning Bay Betong, uy! Hilom ra man kaayo, naa man diay anak gikan sa gawas!” nakatawa og kausa si Bay Estor nga naghigda sa iyang katre samtang gipatong ang tuong kamot sa iyang agtang ug nagkupot sa sigarilyo ang walang kamot.
“Adtuon tika ugma buanga ka. Pangayoan tikag hinaboan gikan sa imong anak.” Ug nakatug si Bay Estor nga naghunahuna kon unsay madawat niya nga pasalubong o unsay pangayuon niyang hinaboan ugma puhon.
Mao pay pagtuktugaok sa mga manok ni Bay Betong pagkabuntag diha na si Bay Estor naglingkod sa lantay nga kawayan diha sa tugkaran nilang Bay Betong ilawom sa bagang mga dahon sa mansanitas.
“Sayo ka man lagi, Bay Estor?” matod ni Bay Betong nga bag-o pang migawas sa ilang balay dala ang patukhunon sa mga manok.
“Maayong buntag diay, Bay Betong! Nia k okay nabalitaan man god nako nga miabot kuno imong anak gikan sa gawas. Asa man siya ron?” mahinamon nga nangutana si Bay Estor.
“Kanang naghigda sa terrace, Bay, ibabaw sa balyuster.” Gitudlo ni Bay Betong ang nahimutangan sa iyang anak.
Nakita ni Bay Estor nga naghukas ang maong tawo. Puno sa mga patik ug daot kaayog lawas. Rockers diay tingali ang trabaho niini sa gawas… morag si Pepe Smith, nagkanayon ang hunahuna ni Bay Estor.
“Nganong nangita man ka niya, Bay Estor?” ni Bay Betong.
“Mangayo ta kog hinaboan niya, Bay, bisag gamay. Ingna imong anak.” Mingisi si Bay Estor.
“Na! Maylagi untag gikan pa sa gawas Amerika akong anak, Bay, kay may hinaboan ka.”
“Asa man diay gawasa gikan imong anak, Bay, nga di man kahatag og hinaboan nako?” midiyong si Bay Estor.
“Gikan tawon na siya nigawas sa bilanggoan, Bay, uy!” matod ni Bay Betong, dayong kurok sa iyang mga anak aron patuktukon. (KATAPUSAN)