Love,
Salamat kaayo sa imong suwat. Daghan ko og gipangtang nga mga information aron di maklaro. Nihangyo man gud ka nga di I publish ang imong suwat, apan anugon man kaayo nga di ni i-share sa readers kay wa man ka mag-inusara ning imong kahimtang. Naa sa gawas o diri ra sa atoa, dunay cases nga ingon ini.
Ang nasod nga imong giaahaan usa sa mga dapit nga dunay ubos kaayong population growth ug ang ilang population pa gyud nagkatiguwang. Nagkagamay ang mga batan-on hinungdan nga nagkinahanglan sila og laing health workers sa ubang mga nasod sama sa Pilipinas.
Conscious kaayo ni sila sa kahimtang nila ug sa ekonomiya. Di sila gustong magkalisodlisod sa pagpuyo.
Ang akong buot ipasabot dinhi, ang imong bana di sa ingon nga di ganahan og bata, apan di na maayo ang tayming. Usa, guwang na siya busa maglisod na siya sa pag-abag sa pagbantay sa inyong anak. Di siya gustong mag-inusara ka sa pag-atiman sa inyong umaabot nga anak. Mao na ang posibleng kahulogan sa iyang pag-ingon nga siya edaran na. Although sa atong standard diri, di pa na guwang kay bisan gani 50 kapin, makapasanay pa man og daghan. Kinsa may moatiman nimo kon manganak ka na?
Wa may lain kon di siya. Gawas kon mopauli ka diri sa atoa aron ari ka manganak diri ug dunay kaabag nimo sa pagbantay.
Unya mahimong mabilin nimo diri samtang mobalik ka sa gawas aron ka manginabuhi. Kana lagi kon mosugot sab ang imong bana.
Nakahibawo siyang di sayon ang pagbuhi sa bata, labina diha sa inyong gipuy-an karon.
Lisod gyud kaayo ang panahon karon bisan kon adunahan pa ang ilang nasod. Taas ang standard of living busa taas usab ang panginahanglan sa pagbuhi sa bata. Di sayon labina kon ang panginabuhian ug income ninyo igo-igo lang sa pagsuporta sa imong pamilya nga nahabilin diri. So, duna siyay rason nganong apprehensive siya nga makabaton mo og anak.
Bug-at baya sab na nga mga rason ang iyang gihatag diha kanimo. Di siya gustong magkalisodlisod ka. Gusto tuod kang makaanak, apan nakita niya ang laing sitwasyon kon makabaton mo og anak.
Hinuon, di pa man sab uwahi kay 27 years old ka pa samtang siya kapin pa sa 40-anyos. Kaya pa kaayo ninyo ang pagbuhat og bata.
Instead mag-emotional ka, nga ako sang nasabtan kay nindot man gyud nang dunay anak, istoryahi siyag balik.
Unsa kaha kon ang ari ka manganak sa Pilipinas ug i-entrust una ninyo ang bata sa imong pamilya samtang magtigom mo aron makapangandam sa umaabot sa inyong pamilya.
Pahibaw-a sab ang imong mga maguwang sa imong problema aron makatabang sab sila sa pagpinsar ug pangitag paagi. Ayaw dayon pag-decide samtang naa ka pa karon sa emosyon.
Kay mas modako ang problema kon mao ni ang imong ipatigbabaw.
Kon mo-decide ka, kinahanglan naa say konsultasyon sa imong pamilya kay dihang nagminyo ka, sila man sab ang imong gikonsiderar. Naminyo ka tungod nila. Diha ka magsugod sa pagtimbang unsay gyuy maayo.
NOY KULAS