PINIRISO sa Cebu City Jail kalit lang nahanaw ug wa na gyud makit-i pa sa mga jail guard sa miaging gabii.
Nagduda ang kadagkuan sa Cebu City Jail nga nakatago sa mga basura ang binilanggo hinungdan nga naka-eskapo kagahapon sa bilanggoan sa Brgy. Kalunasan.
Nasusamang tagulilong ang pinireso nga si Reynald Martorillas, 44, taga Sitio Baka Brgy. Banilad ning dakbayan sa Sugbo kay wa gyuy nakabantay sa iyang pag-eskapo.
Si Martotillas nakombikto sa miaging buwan og 15 ka tuig nga pagkabilango sa kasong kalapasan sa sec.11 sa Republic Act (RA) 9165 kun paghupot sa illegal nga drugas ug Batas Pambansa (BP) no. 6 nga paghupot og mahait nga hinagiban.
Si Insp. Anaclito Dusaran, chief custodian sa New Cebu City Jail nga nahinabi sa dySS Super Radyo, nagkanayon nga mga alas 8:00 niadtong Martes sa gabii dihang nipahigayon silag katapusang head count sa mga piniriso ilang nakompirmar nga kuwang na kini og usa.
Sa ilang pagsusi sa mga suok sa bilanggoan wa na gyud makit-i pa si Martorillas, hinungdan nga dali nilang gipakatap ang duha ka mga team nga maoy nangita niini.
Giklaro ni Dusaran nga sa ilang imbestigasyon nasubay nga posibling nakasakay sa trak sa basura sa Cebu City government ang maong piniriso.
Niadtong Martes sa alas 2:00 sa hapon nagkuhag mga basura ang trak sa dakbayan sa Sugbo.
Matod niya nga dunay usa ka inmate nga nitug-an nga mga 15 minutos sa wa pa moabot ang truck sa basurahan, ilang nakit-an si Martorilla sa area.
Sukad niadto wa na gyud nila kini makit-i.
Giingong nakalusot sa control gate ang piniriso human nagpakaron ingnong dunay ayuhon isip usa ka mekaniko.
Samtang dunay mga panahon nga makagawas sila sa primary gate kon dunay mga panginahanglan sama sa pag-ayo.
Dugang ni Dusaran nga wa gyoy nakabantay sa paggawas ni Martorilla hinungdan nga dako ang ilang pagtuo nga nakasakay ni sa truck sa basura.
Dunay imbestigasyon nga pagahimuon batok na sa ilang mga jailguard aron pagsuta sa ilang mga liability sa pag-eskapo ni Martorillas, kinsa dalhunon na unta sa National Penitentiary alang sa pagsilbe sa iyang sentensya.