NAKALINGKAWAS sa tinong kamatayon ang usa ka barangay kapitan human gipusil sa iyang kanhi barangay treasurer atol sa ilang panaglalis kagahapon sa buntag sa Brgy. Kalambuan, lungsod sa San Remegio, Sugbo.

Samdan sa tuong bukton si Kapitan Carlito Rondina, 26, minyo, taga Brgy. Kanluhangon, lungsod sa Tabuelan, Sugbo human maigo sa bala sa carbine nga gigamit ni kanhi tresuro Daniel Montealto.

Updates on President Benigno Aquino III's presidency

Si Muntealto nadakpan sa kapulisan sa San Remegio.

Si Sr. Supt. Erson Digal, director sa kapulisan sa lalawigan sa Sugbo, niingon nga sayo kagahapon sa buntag si Rondina uban sa iyang mga konstitwente niadto sa balay sa iyang kanhi brgy. treasurer, kinsa nagpuyo sa Brgy. Kalambuan, San Remegio, boundary sa ilang dapit.

Tuyo ni Rondina mao ang pagkuha sa official receipt (OR) alang sa brgy. clearance aron magamit niini sa paghatag sa ilang mga konstituwente sa pag-transact.

Kini human gidala ni Muntealto ang mga resibo sa ilang balay.

Apan dihang niabot ang brgy. kapitan sa balay sa suspek nagkalalis sila.

Atol sa ilang panaglalis, nikuha og pusil si Muntealto ug gipusil si Rondina.

Hinuon ang kapitan nakadagan bisan kon nasamdan siya sa tuong bukton ug ni-report sa kapulisan.

Matod pa ni Digal nga mga duha na ka semana ang nakalabay gitangtang ni Rondina si Muntealto gikan sa pagka barangay treasurer.

Dugang nakuhang impormasyon sa kapulisan nga ang kapitan ug ang suspek dunay karaang panagbangi hinungdan nga ni-resulta sa pagpamusil.

Gihikay na sa kapulisan sa lungsod sa San Remegio ang tukmang kaso nga ilang ipasaka batok kang Montealto, samtang si Rondina nagpaalim pa sa iyang samad sa tambalanan sa dakbayan sa Bogo.

Nasayran nga si kapitan Rondina na kontrobersyal sa miaging election human ang iyang motorsiklo girakrakan sa kaatbang nila sa pulitika nga si kapitan Julito Almacin, Association of Barangay Councils (ABC) president sa lungsod sa Tabuelan. (Guam P. Logroño)