NAMATAY ang bana samtang samdan ang iyang asawa human sila gi-ambush sa duha ka mga tawo nga nagmotorsiklo sa bukiran nga barangay sa siyudad sa Danao.

Ang mga anak nagduda nga tulis ang motibo sa mga mamumuno, apan ang kapolisan miingon nga way nakuha nga kuwarta gikan sa mga biktima kay diha pa kini sa ilang pagsusi sa crime scene.

Updates on President Benigno Aquino III's presidency

Ang namatay human makaangkon og tulo ka mga samad pinusilan giilang mao si Pedro Areja, 54, usa ka traysikad drayber.

Samtang ang nasamdan sa bukton ang iyang asawa nga si Redema Areja, 53,usa ka mamaligyaay og lumpia.

Gitumbok sa mga saksi ang duha ka mga tawo nga nagsakay sa usa ka motorsiklo nga maoy ning-atang ug namusil sa mga biktima.

Si SPO4 Jose Salingua sa Danao city police nibutyag nga nagtulod ang magtiayon sa ilang traysikad nga gikargahan sa ilang mga baligya.

Samtang sila nagtungas sa dalan paingon sa ilang balay sa sityo Cogon, Barangay Cogon Cruz, giatangan sila sa duha ka mga lalake nga nagsakay sa motorsiklo.

Ang backrider maoy armado ug nipusil sa magtiayon.

Ang mga suspek daling nisibat palayo sa maong lugar.

Ang mga silingan nga nakadungog sa mga buto-buto ug ningsusi sa gigikanan niini maoy nakadiskubre sa mga biktima nga samaron ug gidala sa tambalanan.

Si Pedro gideklarar nga dead on arrival sa Danao District Hospital samtang ang iyang asawa gibalhin sa tambalanan sa siyudad sa Sugbo.

Sa pasiuna nga imbestigasyon sa kapulisan nagpakita nga ang mga anak niingon nga way kontra ang ilang mga ginikanan.

Sila nagduda nga tulis ang motibo sa pagpamusil, apan ang kapulisan miingon nga anaa ra ang kwarta sa mga biktima ug wa hilabti sa mga mamumuno.

Ila pang palawman ang imbestigasyon aron gyud pagsuta sa motibo ug mailhan ang mga killer.