DAGHAN ang naka-angay ug daghan usab ang wala maka-angay sa labing unang State of the Nation Address kun Sona ni Pangulong Benigno Simeon Aquino III ug sagad hinuon sa wala maka-angay mao kadtong na-igo sa mga tirada ni P-Noy.

Wala matagbaw ang progresibong grupo kay wala kuno mahilakip sa Sona sa pangulo ang agraryo kay kuno pasangil nila nga di kini mamahimong tinud-on sa Aquino administration tungod sa Hacienda Luisita nga gipanag-iyahan sa ilang pamilya.

Programa sa kabataan ang gipaabot sa mga estudyanteng nagpakabana ug ilang gi alegar nga negusyo lamang posibleng paburan ning maong administrasyon.

Samtang dinhi sa lokal nga senaryo, kompiyansa si Vice Mayor Rody Duterte nga ang gipamahayag ni P-Noy daling matuman tungod kay simple lamang kuno kaayo ang mga trabahu-onon nga iyang gipasalig.

Usa lang ang dili buot mahitabo ni Duterte, kini mao ang economic provision nga giplano sa kanhi administrasyon nga mohatag og higayon sa mga langyaw nga maka-angkon og siyento por siyentong pagpanag-iya sa negusyo ug kabtangan sa atong nasud, tungod kay kon mahitabo kini seguradong mawad-an na gayud og kaugalingong nasud ang mga Pilipino.

Nindot ang programa ni P-Noy bahin sa suliran sa insurhensiya ug sa Bangsa Moro, apan pung ni Vice mayor Duterte nga wala gihapoy mapa-ingnan ang panagsulti alang sa walay kinotubang kalinaw sa atong nasud, tungod kay sa iyang kaugalingon ug personal nga panan-aw, hangtud nga idolohiya ang hisgutanan wala gihapoy kapa-ingnan istoryahan.

Kung wala kay bag-ong ipresentar nga idolohiya nga mas labing nindot sa komunista, dili mahuman ang pakigbisog sa CPP-NPA-NDF.

Alang kanako hangtud nga dili mosabot ug mokooperar ug morespeto ang katawhan sa mamuno sa atong nasud, mamahimong makawang ang programa sa administrasyon nga gipili pinaagi sa piniliay.

Sagad sa mga reklamador batok sa gobyerno mao kadtong mga tawo nga wala ug dili gayud mosalmot sa obligasyong Pilipino.

Dili gayud kita molampos sa atong pangandoy nga kahamugaway karon ug sa umaabot kon ang demokrasya nga atong gipahimuslan kanunay natong abusohan. Kinahanglan natong hinumduman nga walay lider nga perpekto nga ang tanan natong interes iyang paminawon.

Hinumduman lang nato nga matag lider dunay iyang kaugalingong prinsipyo ug plano ug mag-agad usab kini kon unsay iyang prayoridad ug tingali sa sunod nga liderato ang dili prayoridad karon, prayoridad na sa umaabot puhon agad sa panginahanglan.

Alang sa imong sugyot ug komentaryo sulat lang sa amcorphil.leo@gmail.com. Paminawa sab ko sa dxRD, Commando 711, matag alas 6:00-8:00 sa buntag.