ANG kagamhanan ning siyudad sa Davao dili muondang ug magpadayon sa kampanya aron masumpo ang mga sakit nga dengue ug malaria.
Sumala sa datus nga gikan sa Enero 2010 ug hangtud karon mikabat na sa 2,782 ka mga tawo, kadaghanan mga bata, ang gitakboyan sa dengue, usa ka matang sa sakit nga mahimo tungod sa lamok. Sa maong gidaghanon, mikabat na sa 23 ka mga tawo ang namatay.
Gibutyag ni City Health Office coordinator Public Health Nurse Elizabeth Banzon nga ang mga sakit nga dengue ug malaria moulbo matag panahon sa ting-ulan.
Maayo kining gihimo sa siyudad nga paglusad sa kampanya sa lainlaing lugar dinhi sa dakbayan. Apan mas maayo nga mobulig ang katawhan sa kampanya sa kagamhanan ning siyudad.
Ang pagpanghinlo sa palibot sa inyong balay maoy usa sa mga epektibong paagi nga masumpo ang dengue. Apan dili gihapon mosalir ang tinguha nga pagsumpo sa dengue kun ang uban dili manghinlo. Buot ipasabot nga ang tanan kinahanglang motabang.
Sa higayon nga ang blood platelet sa inyong pinanggang anak moubos na ngadto sa 12 mokusog na ang pitik sa inyong kasingkasing sa kabalaka, ilabi na kun mogawas na ang dugo ilong sa bata.
Dili lalim kun mogawas na ang dugo tungod kay basi sa mga panghitabo, mga pasyente gi-abunohan og dugo ug gisud sa intensive care unit sa ospital.
Busa mas maayo nga sundon ang tambag sa mga personahe sa kasanihan ug motabang sa kampanya sa kagamhanan ning dakbayan.