ANG kapulisan sa Davao del Sur misusi na sa nahitabong pagdahili sa yuta sa usa ka lugar didto sa lungsod sa Don Marcelino sa maong probinsiya.

Gilantaw nga ang way puas nga pag-uwan sa tibuok lalawigan maoy hinungdan nga nihumok ang yuta sa Sitio Cabalantian, Barangay Kinanga sa maong dapit.

Gihulagway sa kapulisan nga sukad adlaw'ng Lunes, nibundak na ang kusog nga uwan sa ilang lugar ug nilungtad hangtud sa sunod adlaw.

Nahitabo ang pagdahili sa yuta mga alas 6:50 sa buntag niadtong Martes.

Si Senior Inspector Robert Caraoa, hepe sa kapulisan, nagklaro sa Sun.Star SuperBalita, pinaagi sa telepono, nga way nahitabong danyos o kinabuhing nakalas atol sa landslide sanglit way namuyo sa lugar diin nahagbong ang mga yuta ug bato.

"Gikan diha sa Sitio Talagotong dapit sa seawall, wa na gyud na gipapuy-an kay delikado sa landslide," ni Caraoa.

"Maagian naman hinuon ang dalan kay gipadaplin na ang mga bato," dason niya.

Problemado gyud ang mga motorista sa lugar ugaling mahitabo ang landslide sanglit agianan nila ang dalan.

Gi-alerto sab sa kapulisan ang katawhan ilabi na kon daplin sa kasapaan ang ilang gipuy-an ug andam sa kanunay ugaling motaas ang tubig aron di madisgrasya sa kalit nga pagbaha.

Alerto na kanunay ang Provincial Disaster Coordinating Council (PDCC) sanglit ning panahon sa sigeng uwan gilantaw nang daan nga adunay mga panghitabong landslide o baha sa mga lungsod nga kanunay nga duawon sa kalamidad.

Daghan sab sa katawhan ang naalarma tungod kay apil ang Davao del Sur nga gitay og sa nahitabong sagunsong linog dinhi sa isla sa Mindanao niadtong miaging adlaw ug nahadlok sila nga magka-Tsunami apan una nang nagpagawas og pahayag ang United States Geological Survey (USGS) nga way Tsunami alert. (Dondon Dinoy)