SI KUMANDER Jasmin sa Front Committee 53 sa New People's Army (NPA) nga nagalihok sa North Cotabato, Davao del Sur ug Bukidnon nagkanayon nga ang pangulo sa rebeldeng komunista nga si Jose Maria Sison sa National Democratic Front of the Philippines kaniadto pa nagdeklara nga andam kini sa pagbalik sa peace negotiations tali sa kagamhanan.

Kini maoy giluwatan ni Jasmin agi og tubag sa awhag ni Presidente Benigno Aquino alang sa kalinaw sa nasud.

Si Sison, founder sa Communist Party of the Philippines ug chief political consultant sa NDFP negotiating panel, nagpahayag nga ang NDFP nihatag sab og signal nga andam sila sa pagpakigkita didto sa Netherlands o sa Norway sa usa ka senior emissary o grupo sa mga emisaryo sa kagamhanan aron motuki sa mga posibleng pamaagi ug panan-aw sa GRP-NDFP peace negotiations.

Sa una niyang State of the Nation Address niadtong Lunes, si Presidente Aquino nideklara nga ang iyang administrasyon andam sa pagpahamtang og ceasefire ug pagbalik sa negotiating table uban sa mga rebeldeng komunista basta uyon sila sa pagpangita og solusyon sa mga problema.

Gidugang ni Jasmin nga si Sison, nga tua nakabase sa Netherlands, niingon nga iya nang gitanyag ang gihanyag ang GRP-NDFP peace negotiations, ilabi na ang kabahin sa social ug economic reforms nga nagsubay sa The Hague Joint Declaration.

Si Jasmin nagklaro nga bisan sa giluwatan ni Presidente Aquino, magpadayon pa gihapon ang ilang pakigbisog batok sa kagamhanan. (Edgardo Fuerzas)