NAGPASALAMAT ang Philippine Drug Enforcement Agency (PDEA) sa tanang law enforcement agencies nga mitabang sa pagsumpo sa illegal nga droga dinhi sa rehiyon onse, sigun ni PDEA director Roybel Sanchez.

"Kami po ay nagpasalamat sa kanila dahil pusposan din ang kanilang kampanya laban sa illegal na droga," ni Sanchez dihang gihinabi kagahapon sa SuperBalita.

Si Sanchez nagpahayag sa iyang pasalamat sa tanang units ilawom sa Davao City Police Office (DCPO) nga kanunay nakasikop og mga shabu pusher.

Gawas sa DCPO, suma ni Sanchez, anaa sab mitabang kanila ang Task Force Davao ug Criminal Investigation and Detection Group (CIDG) 11.

Ang TF Davao kanunay makasikop og mga marijuana pusher pinaagi sa ilang check-point didto sa Barangay Sirawan, distrito sa Toril ug Barangay Ilang, distrito sa Bunawan.

Ang CIDG maoy nakasikop sa 29 ka mga suspetsadong shabu pusher ug misakmit sa duolan tunga sa milyon nga kandtidad sa shabu didto sa Barangay 31-D ug Barangay 76-A Bucana.

"Nakakatulong talaga ang kanilang effort in solving the problem on illegal drugs in the region," ni Sanchez kinsa midugang nga nagpasalamat sab siya sa katawhan nga kanunay nagpahibalo kanila sa kalihukan sa mga pushers.

Niadtong miaging adlaw, nasikop sa hiniusang pwersa sa DCPO ug PDEA ang usa ka pusher didto sa Kilometro 11, Barangay Sasa, siyudad sa Davao.

Nasikop mao si Nasher Amsirabi, 41, lumad nga taga Logos, Jolo, Sulu ug nagpuyo sa Kilometro 11, Barangay Sasa.

Si Amsirabi gisikop pinaagi sa buy-bust operation sa kapulisan nga miresulta sa pagkasakmit sa upat ka paketeng shabu ug usa ka kaha sa sigarilyo nga puno og pinaugang dahon sa marijuana.

Ang suspetsado atua karon gipriso sa DCPO samtang gihikay ang kasong paglapas sa Republic Act 9165 kun Comprehensive Dangerous Drugs Act of 2002. (AD)