USA ka mag-uuma ang gipusil sa wala mailhing tawo kinsa nag-inom sa gawas sa balay sa biktima sa alas 7:30 sa gabii niadtong Martes.

Ang biktima mao si Ian Perez Lopez, 39, minyo, nagpuyo sa Block 44, Lot 2, Leviticus St., Emily Homes, Barangay Cabantian, distrito sa Buhangin, siyudad sa Davao.

Si Lopez gipusil makausa ka higayon samtang misulod siya sa iyang balay aron magkuha og "ice" nga gipangayo sa suspetsado, sigun ni PO3 Timothy Manlatican sa Buhangin Police Station.

Matud ni Manlatican nga sa wa pa mahitabo ang pagpamusil, duha ka mga tawo ang nag-inom og beer sa gawas sa balay sa biktima.

Giingon nga nangayo og "ice" ang duha ka mga tawo mao nga misulod ang biktima apan gisundan siya sa usa ka tawo nga nagbitbit og pistola.

Ang maong tawo wa naglangan og panahon iyang gipusil ang biktima sa walang kilid hinungdan nga gidala siya didto sa San Pedro Hospital tungod sa samad.

Ang duha ka mga tawo, human sa hitabo, daling misakay sa usa ka motorsiklo paingon ngadto sa wa masayri nga direksiyon.

Nahipus sa kapulisan ang usa ka baseyo sa bala sa .45 kalibre nga pistola didto sa crime scene.

Samtang gisuwat ning balita, gihimo sab sa kapulisan ang lawom nga imbestigasyon aron sayron kung kinsa ang namusil sa biktima ug tugkaron ang motibo sa maong krimen. (Alger Dura)