GIPAUBOS na sa ABS-CBN management ang kurtina sa labing kinaham nga programa nga noontime show Wowowee. Ang programa nga gidumala sa kontrobersiyal nga host nga si Willie Revillame, naghakot og daghang salapi alang sa tv station pinaagi sa kita sa mga advertisements.
Gawas niini, tungod kay top rated sa mga surveys, nakatabang ang programa sa pagtaas sa rating sa daghang mga programa sa ABS-CBN.
Gikataho usab nga gipalukapa sa Wowowee ang mga kaatbang nga programa nga sa dugay nga panahon maoy numero uno sa mga survey.
Isip ganti sa iyang nahimo, gibugtian si Willie og dakong grasya sa ABS-CBN ug wa siya buhii ug gani gitabangan pa dihang nahitabo ang Ultra stampede atol sa pagsaulog sa sumad sa Wowowee nga mikalas sa daghang mga kinabuhi.
Apan miabot ang panahon nga sama sa 'gihagit' ni Willie ang management sa tv station nga pahawaon si radio commentator Joebert Sucaldito ug kun dili siya putnbolon, siya si Willie ang mopahawa.
Gigamit sa tv management ang sakto nga desisyon, wa naminaw sa 'demand' ni Willie.
Mipahawa si Willie ug dihang gihimo ang negosasyon, gihukman sa tagdumala nga di na siya paguniton sa programa hangtud mahuman ang iyang kontrata.
Usa kini ka leksiyon sa mga talent nga nag-klik. Kinahanglan nga itamak kanunay ang tiil sa yuta, luyo sa dakong kita nila ug sa ilang pagka ilado.
Dili mahimong hagiton ang tagdumala usa ka patigayon sama sa ABS-CBN sa usa ka nga talent bisan og unsa pa siya kasikat, tungod kay dali ug sayon lamang sila pulihan apan ang institusyon magpabilin.