ANG Davao del Sur Provincial Police Office (DDSPPO) nagpahugot sa ilang kampanya batok ilegal nga druga ilabi na sa mga tunghaan aron masigurong luwas ang mga estudyante gikan sa pagka-adik.
Si Senior Supt. Ronald dela Rosa, provincial police commander, nagmando sa tanang hepe nga i-monitor gyud ang mga tunghaan sa ilang lugar.
Nabalaka ang kapulisan nga makasud sa Davao del Sur ang mga tawong nagpayuhot og gidiling druga gikan sa mga silingang dapit sama sa North Cotabato, South Cotabato, Sultan Kudarat ug probinsiya sa Bukidnon.
Niguwa sa intelligence report nga buot sudlon sa mga illegal drug traffickers ang mga lugar sa Davao Region.
Gumikan niini, gipahimangnuan sa kapulisan ang mga magtutungha nga di gyud magpalingla pinaagi sa paggamit sa gidiling druga sanglit kanunay nga sila maoy puntirya sa mga drug pusher.
Buot sab sa DDSPPO nga mohimo og deployment ang kapulisan ngadto sa mga nag-unang tunghaan sa dakbayan ug mga silingang lungsod aron panid-an ang mga tawong katingad-an og lihok nga mopaduol sa ilang target.
Di lang kay mga pinaugang dahon sa marijuana (cannabis sativa) ang buot palutson sa mga drug pusher kon di apil na ang metamphetamine hydrochloride o shabu.
Busa nangayo sab og kooperasyon sa mga ginikanan ang otoridad nga motabang pagpahinumdom sa ilang mga anak nga likayan ang paggamit niini. (Orlando B. Dinoy)