MOABOT na sa 68 ka kaso sa dungue ang natala sa City Health Office sa siyudad sa Tagum ug tulo na ang napatay sukad sa bulan sa Enero ngadto sa Hulyo.

Sumala pa ni Dr. Arnel Floirendo sa City Health Office sa siyudad sa Tagum nga sigun sa ilang gihimong monitoring paspas ang pagsaka sa nahisgutang kaso sa pagtungtung dayon sa bulan sa Hulyo.

Sukad Enero hangtud Hunyo, duna lamang 20 ka kaso ang natala. Apan pag-abot sa Hulyo, paspas nga misaka ug miabot sa 68 ug tulo na ang patay.

Mga barangay nga dunay kaso sa mga nangamatay mao ang Barangay Madaum, Magdum, ug Bingcungan.

Gisulti sab ni Floirendo nga sagad sa mga nangamatay mga bata tungod kay ubos ang ilang immune system aron ibatok sa sakit itandi sa mga hamtung.

"Sagad sa mga nangamatay mga bata gyud, ubos man gud ang ilang immune system ikumpara natong mga tiguwang," sulti ni Floirendo sa paghinabi sa Superbalita.

Hinuon, gipasalig ni Floirendo nga ang ilang buhatan todo ang pagpaningkamot aron dili na madungagan ang ihap sa mga natakbuyan sa sakit nga dengue. (Marvin Pineda)