USA ka babaye ang nakit-ang patay sulod sa lodging house alas 10:00 sa gabii niadtong Miyerkules didto sa siyudad sa Cotabato.
Hangtud karon blangko pa ang mga otoridad sa pagkatawo sa biktima gumikan kay walay mga identification card nga nakuha sa patay nga lawas.
Si Cotabato City Police Director Senior Supt. Willie Dangane nagsulti nga basi sa pagsusi sa iyang mga imbestigador, nag-check-in ang biktima kauban ang usa ka lalaki sa alas 2:00 sa hapon sa Avenue Lodge.
Pipila ka oras ang milabay, migawas ang lalaki apan wala niya gikauban ang babaye. Namatikdan matud pa sa mga roomboy nga nagdali-dali kining milakaw nga mora og dunay gikahadlukan.
Dali nilang gisusi ang kuwarto nga gisudlan sa duruha. Apan bisan unsaon nila pagtuktok ang pultahan sa kuwarto wala gyud sila ablihi ug wala say mitubag sa intercom.
Tungod niini, gipugos na lamang pagbukas nila ang pultahan ug sa dako ang ilang kakurat nakita nga naligo na ang babaye sa iyang kaugalingong dugo.
Ang biktima nahiagum og samad sa liog gamit agi sa icepeck.
Ang biktima gibana-bana nga nagpangidaron og 20 hangtud 25 anyos, pution, 5'4" ang gitas-on, ug taas og buhok.
Samtang ang lalaking suspek gihulagway nga itumon ang pamanit, 25 hangtud 35 anyos ang pangedaron, army cut ang tupi sa buhok ug 5'7" ang gitas-on.
Gitahasan na ni Cotabato City Mayor Japal Guiani ang kapulisan nga susihon ang hitabo aron mailhan ang biktima ug ang suspek sa krimen. (Edgardo Fuerzas)